Samir Bağırov ailə münasibətlərindən danışdı: "Biz dünya vətəndaşıyıq"

Müğənni Samir Bağırov "Həftənin qonağı" verilişində şəxsi həyatı və ailəsi ilə bağlı səmimi açıqlamalar verib.

BAKU.WS-in məlumatına görə, sənətçi uzun illərdir ABŞ-də yaşayan anası ilə görüşə bilmədiyini bildirib.

Onun sözlərinə görə, anası ilə hər gün videozəng vasitəsilə əlaqə saxlayır və onu ən böyük dəstəkçisi hesab edir. Samir Bağırov qeyd edib ki, anası onun geyim tərzinə xüsusi önəm verir və daha çox klassik, ciddi üsluba üstünlük verməsini istəyir. Azad və rahat geyim tərzini isə bəyənmir.

Müğənni bildirib ki, Amerikaya getmək istəməməsinin əsas səbəbi orada qalmağa məcbur ediləcəyindən ehtiyat etməsidir. O, atası ilə münasibətlərinin yaxşı olduğunu da vurğulayıb. Bir müddət anası ilə aralarında inciklik yaşandığını deyən sənətçi, sonradan bu gərginliyin aradan qalxdığını bildirib.

Samir Bağırov ailə bağlarından da danışaraq, bacısının Niderlandda yaşadığını qeyd edib. Bacısının ailəsinin müxtəlif millətlərdən olan insanlarla qurulduğunu söyləyən müğənni, "Biz əslində dünya vətəndaşıyıq" sözləri ilə fikirlərini yekunlaşdırıb.