"Tunel qırğını": 33 il öncə Kəlbəcərdə nələr baş verib?

1993-cü il martın 31-də Kəlbəcərdə baş vermiş "Tunel qırğını"ndan 33 il ötür.

Kəlbəcər rayonunun Ermənistan Silahlı Qüvvələri tərəfindən işğalı zamanı Kəlbəcər-Laçın tunelində vətəndaşlarımız qətlə yetiriliblər.

Kəlbəcər-Laçın tunelində qırğın Kəlbəcərin 36 kəndini birləşdirən yeganə avtomobil yolunu ələ keçirmək, bu rayonu mühasirədə saxlamaq məqsədilə törədilib. Qadın, yaşlı, uşaq da daxil olmaqla ümumilikdə 52 nəfər qətlə yetirilib, 64 nəfər əsir götürülüb.

Rayon ərazisini işğal edərkən tunelin qarşısında pusqu quran erməni faşistləri həmin gün buradan keçərək, təhlükəsiz yerə getməyə çalışan dinc azərbaycanlıları gülləyə tutaraq qətlə yetiriblər. Sağ qalanlar girov götürülüb, uzun müddət dəhşətli işgəncələr görüblər.

Tuneldə qətliam törədən faşist dəstəsinə məşhur terrorçu, sonralar Ağdam rayonu ərazisində Azərbaycan hərbçiləri tərəfindən məhv edilən "Avo" ləqəbli Monte Melkonyan başçılıq edib.