Nazir xəstəxanaya yerləşdirilən aktyorun son vəziyyətini açıqladı - FOTO

İki gün əvvəl xəstəxanaya yerləşdirilən tanınmış aktyor Nuri Alçonun son vəziyyəti açıqlanıb.

BAKU.WS Türkiyə KİV-ə istinadən xəbər verir ki, bu barədə Türkiyənin Səhiyyə Naziri Fahrettin Koca məlumat yayıb.

Nazir 73 yaşlı aktyorun vəziyyətinin stabil olduğu və müalicələrinin davam etdirildiyini qeyd edib:

"Aktyorun şəhər xəstəxanamızda ilkin müayinələri nəticəsində ürək çatışmazlığı, ağciyər ödemi və beyin damarlarının tıxanması aşkarlanıb. Pasiyentimizin müalicəsi reanimasiyada davam etdirilir. Onun tezliklə sağalmasını diləyir, yaxınlarının kədərini bölüşdüyümüzü bildiririk".

Xatırladaq ki, Nuri Alço bayram üçün doğulduğu Eskişehirə yollanıb. Gecə saatlarında onun səhhəti qəfil pisləşib. Aktyor həyat yoldaşı və yaxınlarının köməkliyi ilə dərhal xəstəxanaya yerləşdirilib.