İlham Əliyev Özbəkistan üçün bərə tikintisini sürətləndirməyə çağırıb

Azərbaycan Prezidenti İlham Əliyev Özbəkistan üçün bərə inşasının sürətləndirilməsinin və layihəyə prioritet xarakter verilməsinin zəruriliyini bildirib.

BAKU.WS xəbər verdiyi kimi, dövlət başçısı bu barədəAzərbaycan və Özbəkistan Ali Dövlətlərarası Şuranın 3-cü iclasında bildirib.

"Nəqliyyat-tranzit sahəsində artıq müəyyən nəticələrimiz var. Mənə məruzə ediblər ki, Özbəkistandan Azərbaycan ərazisindən yüklərin həcmi artır. Özbəkistan üçün bərə tikintisini də sürətləndirmək zəruridir. Şavkat Miromonoviçlə bu barədə danışmışıq. Məsələ həllini tapıb, sadəcə, bu layihəni prioritet siyahıya daxil etmək lazımdır. Hazırda gəmiqayırma zavodumuzda, eyni zamanda, təxminən on müxtəlif modifikasiyalı - bərə, tanker və quru yük gəmiləri inşa edilir. Zavod indi yüz faiz gücü ilə işləyir, ona görə də düşünürəm ki, bura bərə üçün ən uyğun yerdir".

Azərbaycan lideri həmçinin Rəqəmsal İnkişaf və Nəqliyyat Nazirliyinin diqqətini Özbəkistan üçün bərə inşası məsələsinin prioritet xarakterinin nəzərə alınması zərurətinə yönəldib.