“Bu vəziyyətdə məni kim sevəcək?” deyən qaziyə ərə gedən Milli Qəhrəman qızı ilə MÜSAHİBƏ + FOTO

Birinci Qarabağ Müharibəsinin şəhidi - Azərbaycanın Milli Qəhrəmanı Yuri Kovalyovun qızı Regina Kovalyova Vətən Müharibəsinin qazisi Denis Quzlayevlə ailə həyatı qurub.

Denis Quzlayev Vətən Müharibəsi zamanı Füzuli, Cəbrayıl, Hadrut və Xocavənd rayonlarının azad edilməsi uğrunda döyüşlərdə iştirak edib.

O, Xocavənd istiqamətində gedən döyüşlər zamanı ağır yaralanıb, bir neçə çətin əməliyyat keçirib.

Şəhid qızı Regina Kovalyova isə həm də Azərbaycanın Rus İcmasının fəal üzvü olaraq qurumun Nizami rayon təşkilatının gənclər qrupunun rəhbəridir.

Cütlük arasında bir müddət əvvəl rəsmi nikah bağlansa da, hələlik toy olmayıb.

Milli Qəhrəmanın qızı Regina Kovalyova Modern.az-ın suallarını cavablandırıb. Onunla müsahibəni təqdim edirik:

- Regina xanım, sizi Milli Qəhrəmanın qızı olaraq tanıyırıq. “Milli Qəhrəman övladı” anlayışı sizin üçün nə ifadə edir?

- Azərbaycanın Milli Qəhrəmanının qızı olmaq qürurverici olmaqla yanaşı, həm də böyük məsuliyyətdir.

- Vətən Müharibəsinin qazisi Denis Quzlayevlə necə tanış olmusunuz?

- Denislə xəstəxanada tanış oldum. Əmim Azərbaycanda tanınmış futbolçu-qapıçı Vitali Kovalyov mənə zəng etdi ki, xəstəxanada rus veteran var və biz ora getməliyik. Pasxa bayramı idi və biz qazilərimizi təbrik etmək istəyirdik. Təbii ki, dərhal razılaşdım. Denis əməliyyata hazırlaşırdı və başına gələnləri bizə danışdı. Təbii ki, mən dərhal necə cəsarətli oğlan olduğunu düşündüm. Mən müharibənin nə olduğunu əvvəldən bilirəm və onun törətdiyi faciəni yaşamışam. Denis əməliyyatdan öncə mənə müharibədən əvvəl çəkdirdiyi fotoşəkilləri göstərdi və “görəsən, məni kim belə sevəcək?” ifadəsini söylədi. Dərhal cavab verdim ki, narahat olma, mütləq yaxşı bir qızla tanış olacaqsan və o, səni sevəcək. Axı siz Azərbaycanın fəxrisiniz.

Mən ona söz verdim ki, mütləq yenə gələcəm. Ünsiyyətimiz dostluqdan başladı. İlk növbədə Denisə psixoloji dəstək verməyə çalışdım. Onun, həqiqətən, dəstəyə ehtiyacı var idi. Beləliklə, dost olmağa başladıq.

- Birinci Qarabağ müharibəsində şəhid olan Milli Qəhrəmanın qızı və İkinci Qarabağ müharibəsində qazi olan əsgərin həyat yoldaşı... Nə deyə bilərsiniz?

- Bu haqda danışmaq çox qürurverici, həm də çox çətindir...

- Atanızı sizdən alan müharibə 30 ildən sonra eyni alovun içərisindən keçən oğlanı sizinlə qarşılaşdırdı. Bunlar necə hisslərdir?

- Çox maraqlı sualdır. Amma təbii ki, bu suala cavab vermək çətindir, çünki bunlar qeyri-adi hisslərdir. Atam Xocavənd rayonunda öldürülüb, Denis isə həmin ərazidə yaralanıb...

- Bir çox xanımlar qazilərin travmalarına görə onlarla ailə qurmağa ehtiyat edirlər. Sizdə belə bir tərəddüd var idimi?

- Veteranlarımız bizim fəxrimizdir. Doğrudan da, Ali Baş Komandanımız İlham Əliyevin rəhbərliyilə igid oğullarımızın sayəsində torpaqlarımızı azad etdik. Ona görə də bizim qəhrəmanlarımız, veteranlarımız üçün ən vacibi onlara hörmət və qürur duyulmasıdır. Denisə heç vaxt yazığım gəlməyib, əksinə, mən həmişə onunla fəxr edirəm.

- Ağır əməliyyatlar keçirmiş Denisin səhhətində artıq hər şey yaxşıdır, yoxsa qarşıda yenə əməliyyat gözlənilir?

- Denis ağır yaralanıb və sağalması heç də asan deyil. O, 10 gün komada qaldı və artıq 6 çətin əməliyyatdan keçib. Qarşıda bizi daha 2 əməliyyat gözləyir. Təbii ki, beyin sarsıntısı var, parçalanır, nəfəs ala bilmir, gözünün biri 20 faiz görür, dişlərinin yarısı yoxdur və çənəsi yenidən bərpa olunacaq. Ancaq buna baxmayaraq, o, səbir edir və bütün bu əməliyyatların uğurlu alınacağına inanırıq.

- Nikah masasına oturmusunuz. Bəs toy günü təyin edilibmi? Tanınmış simalardan kimləri dəvət etməyi düşünürsünüz?

- Toyumuzu bu il ərzində reallaşdırmağı planlaşdırırıq. Hələ dəqiq tarixlə bağlı qərar verməmişik. Çünki Denisin əməliyyatları mənim üçün çox önəmlidir. Yalnız bundan sonra tarixi təyin edəcəyik. Toyumuzda iştirak etmək istəyənlər çoxdur. Pandemiya şəraiti ilə bağlı hələ necə edəcəyimizi bilmirik. Ona görə bu haqda hələ dəqiq nəsə deyə bilmirəm.

- Atanız cəbhənin Xocavənd istiqamətində şəhid olub. Denis də Xocavənd istiqamətində ağır yaralanıb. Xocavənd haqqında fikirlərinizi bilmək maraqlı olardı, bu ərazi sizin üçün nə ifadə edir?

- Qarabağ mənim bir hissəmdir, amma eyni zamanda dərdimdir. Atamı orada itirmişəm. Təəssüf ki, ailəmiz hələ Qarabağa getməyib. Ümid edirəm ki, biz də azad Qarabağa gedə biləcəyik. Atamın vəfat etdiyi yeri, Xocavəndi ziyarət edə biləcəyəm. Ən əsası Şuşa şəhərində atamın arzusunu yerinə yetirməliyəm. Bunu səbirsizliklə gözləyirəm.

- Nə idi atanızın arzusu?

- Atam Qarabağın bütün bölgələrində və həmçinin də Şuşada olub. Onun ən böyük arzusu Azərbaycan bayrağını Şuşada dalğalandırmaq idi. Təəssüf ki, o, bu arzusunu həyata keçirə bilmədi. Atamın ruhunu şad etmək və onun bu arzusunu gerçəkləşdirmək istəyirəm. Gözləyirəm ki, ailəmizi, anamı, bacımı, əmimi, məni və Denisi Şuşaya dəvət etsinlər. Ümid edirəm ki, bu arzumuz tezliklə reallaşar. Düşünürəm ki, bizim ailəmiz də Şuşaya getməyə layiqdir. Çünki atam Milli Qəhrəmandır və biz onu Qarabağ müharibəsində itirmişik. Tezliklə atamın əvəzinə Şuşada bayrağımızı mən qaldıracağam və bunu atama həsr etmək istəyirəm.

Denislə birgə Qarabağa getməyi çox istəyirik. Çünki Qarabağımızın azad olunmasını çoxdan gözləyirdim.

Qalereya