Basayevin bandasının iki üzvü 25 il sonra saxlanıldı

Rusiyanın hüquq-mühafizə orqanları Şamil Basayevin bandasının iki döyüşçüsünü Çeçenistanın Çervlennaya kəndi yaxınlığında Müdafiə Nazirliyinin hərbçilərinə hücumdan təxminən 25 il sonra saxlayıblar.

Bu barədə Rusiya İstintaq Komitəsi və Rusiya Federal Təhlükəsizlik Xidməti (FTX) İctimai Əlaqələr Mərkəzi məlumat verib.

"Rusiya İstintaq Komitəsi ilə birgə aparılan iş nəticəsində, Tümen vilayəti sakinləri olan Rusiya vətəndaşları Murtazəli Alimgireyev (1978-ci il təvəllüdlü) və Alimxan Kadraşovun (1969-cu il təvəllüdlü) bu cinayətdə iştiraklarına dair təkzibedilməz sübut bazası formalaşdırılıb. Bu şəxslər müəyyən edilən ünvanlarda saxlanılıb",-deyə məlumatda qeyd edilib.

Yamal-Nenets muxtar dairəsinin Novi Urengoy şəhər məhkəməsi və Xantı-Mansiysk muxtar dairəsinin Surqut şəhər məhkəməsi tərəfindən onlar həbsə alınıb.

İstintaq Komitəsi qeyd edib ki, 1999-cu ildə Alimgireyev və Kadraşov könüllü olaraq Basayev və Xattabın bandasına qoşulublar. 1999-cu ilin oktyabrın 4-də səhər erkən saatlarında Çeçenistan Respublikasının Şelkovski rayonundakı Çervlennaya kəndi yaxınlığında hazırlıqlı mövqelərdə olan banda üzvləri, o cümlədən Alimgireyev və Kadraşov, Xattabın ümumi rəhbərliyi altında Rusiya Müdafiə Nazirliyinin hərbçilərinə silahlı hücum ediblər. Kütləvi atışma nəticəsində 15 hərbçi həlak olub, 28-i müxtəlif dərəcəli yaralanıb.