Azərbaycan XİN rəhbərinin müavini WUF13-də mina problemini gündəmə gətirib

Münaqişədən sonra Azərbaycan yenidənqurma işlərinə təxminən 15 milyard ABŞ dolları xərcləyib və hər il dövlət büdcəsinin təxminən 25 faizini bu istiqamətə ayırıb.

BAKU.WS apa-ya istinadən xəbər verir ki, Azərbaycan xarici işlər nazirinin müavini Yalçın Rəfiyev WUF13 çərçivəsində keçirilən "Böhrandan sonra bərpa və yenidənqurmanın mərkəzində mənzil məsələsi" adlı tədbirdəki çıxışında deyib.

"Hər bir ölkənin və hər bir vəziyyətin özünəməxsus çətinlikləri var. Bizim üçün bu çətinliklərdən biri minalardır. Bərpaya və yenidənqurmaya başlaya bilərsiniz, lakin bu prosesin başlaması üçün əlverişli mühit olmalıdır. Azərbaycanda qarşılaşdığımız problemlərdən biri də odur ki, bərpa və yenidənqurmaya başlamazdan əvvəl təmizlənməsi lazım olan 1,5 milyon mina mövcud idi. Bu isə o deməkdir ki, maliyyə baxımından hazır ola bilərsiniz, siyasi baxımdan əlverişli şəraitiniz - məsələn, sülh sazişi və ya atəşkəs - mövcud ola bilər, amma ərazilərdə minalar olduğu üçün həmin bölgələrə daxil olmaq və bərpaya başlamaq mümkün olmur. Lakin düşünürəm ki, son bir neçə ildə formalaşdırdığımız model dünyaya yaxşı nümunədir. Münaqişədən sonra Azərbaycan təxminən 15 milyard ABŞ dolları xərcləyib və hər il dövlət büdcəsinin təxminən 25 faizini bu istiqamətə ayırıb. Bu da münaqişədən zərər çəkmiş ölkələr üçün yaxşı nümunədir: əgər hər şeyi sıfırdan qurursansa, daha yaxşı qurmalısan",- Yalçın Rəfiyev qeyd edib.