Azərbaycan və Ermənistan səfirləri Tramp marşrutu təşəbbüsü ilə bağlı tədbirdə iştirak ediblər

Azərbaycanın ABŞ-dəki səfiri Xəzər İbrahim Tramp marşrutu təşəbbüsünə həsr olunan dəyirmi masada iştirak edib.

BAKU.WS Oxu.Az-a istinadən xəbər verir ki, bu barədə ABŞ-Azərbaycan Ticarət Palatası (United States-Azerbaijan Chamber of Commerce - USACC) məlumat yayıb.

Məlumata görə, tədbirdə Azərbaycan təmsilçisi ilə yanaşı Ermənistan, Gürcüstan, Qazaxıstan, Qırğızıstan, Türkmənistan və Özbəkistan səfirləri, ABŞ hökumətinin nümayəndələri və biznes təmsilçiləri iştirak ediblər.

"ABŞ Administrasiyasının təşəbbüsü ilə Azərbaycan və Ermənistan arasında avqustda əldə edilən sülh razılaşması tarixi bir başlanğıc yaratdı. TRIPP - bu razılaşmanın dayanıqlığını təmin etmək, tranzit marşrutunu ümumi rifahın mühərrikinə çevirmək üsuludur", - deyə ABŞ Dövlət Departamentinin Sülh Missiyaları üzrə Ofisinin direktoru Vinay Çavla bildirib.

Azərbaycanın ABŞ-dəki səfiri Xəzər İbrahim deyib ki, avqust görüşü regional sülh prosesinin irəliləməsində tarixi rol oynayıb:

"Azərbaycan qarşılıqlı əməkdaşlıq və əməkdaşlıq prinsipləri çərçivəsində Türkiyə, Gürcüstan və Orta Asiya ölkələri ilə tərəfdaşlıq əlaqələri qurub. Orta Dəhlizin əsas komponenti kimi TRIPP layihəsini uğurla həyata keçirmək vacibdir."

"TRIPP-i regional strategiyamızın əsas elementi kimi təqdim edə bilmişik. Azərbaycanlı həmkarlarımızla konstruktiv əməkdaşlığı və müzakirələrin inkişaf layihələrinə doğru irəliləməsini alqışlayıram. Belə praktiki əməkdaşlıq real iqtisadi və sosial nəticələrin əldə edilməsi üçün vacibdir", - deyə Ermənistanın ABŞ-dəki səfiri Narek Mkrtçyan bildirib.

Qalereya