Azər Badamov: "Beşinci kolon" indi tam anlamı ilə ifşa olundu"

Beşinci kolon" indi tam anlamı ilə ifşa olunub. Niyə indi sualının cavabı isə şübhəsiz ki, xaricdəki himayədarlarının öz planlarının da boşa çıxmasıdır. Vaxtilə "yağlı" dönəmdə alınan direktivlər bu gün Ramiz Mehdiyevi, Əli Kərimlini, Cəmil Həsənlini quru yurdda qoydu".

BAKU.WS xəbər verir ki, bu fikri Oxu.Az-a açıqlamasında Milli Məclisin deputatı Azər Badamov səsləndirib.

O vurğulayıb ki, vətənimizi quru yurdda qoymağa çalışan, quyruğu şimalın əlində olanlar yurdumuzu talamağa çalışsalar da, bu riyakarların, saxtakarların qarşısına elə xalq özü sipər çəkdi:

"Dövlət Təhlükəsizliyi Xidməti bir-bir, ilmə-ilmə hamısının haqqından gəlir. Haqqın-ədalətin ünvanı isə heç yer, heç kəs deyil, məhz Azərbaycan qanunları və Azərbaycan xalqıdır. Məhz qanunlarımız və xalqımız bu xəyanətkar qruplaşmaların layiqli cavabını verəcək. Adı "qruplaşma", "sövdələşmə" olan, bütünlükdən isə nəinki siyasi baxımdan, heç xarakter olaraq da pay ala bilməyən bu ünsürlər Azərbaycanın bütöv olmasını, bir olmasını heç cür həzm edə bilmədilər. Necə oldu ki, Qarabağ Zəfərinə hər kəs bir ağızla sevinərkən, onlar ağız büzdülər? Düşünürəm ki, ağlagələn istənilən sual ritorikdir. "Milli maraq", "xalq", "xalqın gələcəyi", "parlaqlıq", "şəffaflıq" deyərək bağıranların bulanıq suda balıq tutmağa çalışdığı lap da aydın göründü. Dövlətin və xalqın əleyhinə olan bu qüvvələr, antimilli ünsürlər artıq elə ifşa oldular ki, nəinki qaçacaq, heç sığınacaq yerləri yoxdur".

Deputat qeyd edib ki, cənab Prezident İlham Əliyevin rəhbərliyi altında uğurla inkişaf etdirilən siyasi dialoq mühiti sağlam təfəkkürə, sağlam rəqabətə açıqdır:

"Xalqı düşünürmüş kimi obraz yaradanlar isə məhz elə xalqa zərbə vuranlardır. Bu gün Azərbaycanın siyasi meydanı da onun qalib statusuna uyğun olmalıdır. Azərbaycan xalqı ölkəni yox olmaqdan xilas edən qüvvə - ümummilli lider Heydər Əliyevin siyasi yolunda əzmlə irəliləyir. Məhz cənab Prezident İlham Əliyev dünyanın təlatümlərlə dolu mənzərəsində xalqın ümid və inam yeridir. Birinci vitse-prezident Mehriban Əliyeva bu məşəqqətli yolda dövlət başçımızın ən sadiq silahdaşı kimi Azərbaycanın qalib imicinə yaraşan şəkildə bizi dünyaya ləyaqətli xalq olaraq tanıtdırmaq siyasətinə qətiyyətlə dəstək verir. Xalq bu işdə birlik, həmrəylik nümayiş etdirir. Xüsusilə də, Dövlət Təhlükəsizliyi Xidmətinin, hüquq-mühafizə orqanlarının bu işdə qətiyyətli addımlarının şahidiyik ki, istənilən çirkli oyunun qarşısının alınması milli maraq məsələsi olduğundan dövlət-xalq birliyi bu məsələdə də möhkəmdir".