VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

"Human Rights Watch" və "Amnesty International"ın bəyanatları dünyaya hörümçək toru, zəhər tuluğu kimi səpələnmiş erməni lobbisinin, diaspora təşkilatlarının məğlubiyyətidir.

Bu sözləri BAKU.WS-ə politoloq Şəbnəm Həsənova bildirib. 

Onun sözlərinə görə, hər iki təşkilat Ermənistanın Azərbaycanın Bərdə şəhərinə istifadəsi qadağan olunmuş kasetli raketlərlə zərbələr endirdiyini təsdiqləyib:

"Təşkilatlar adından yayılan bəyanatlarda klaster silahlardan istifadəni yasaqlayan Konvensiyaya istinad edilərək bildirilir ki, Ermənistan silahlı qüvvələrinin bu yasağı pozması nəticəsində oktyabrın 28-də Bərdədə 21 mülki şəxs həyatını itirib, 70 nəfər isə yaralanıb. Eyni zamanda, təşkilatların mütəxəssisləri - hərbi ekspert Brian Castner, keçmiş BM hərbi müşaviri Marc Garlasco və tədqiqatçı Justin Bronk şəhərə erməni qüvvələri tərəfindən atılan silahın markası, texniki göstəriciləri barədə detallı bilgilər veriblər.

"Amnesty International"ın Şərqi Avropa və Orta Asiya üzrə regional direktoru Marie Struthersin adından yayılan bəyanatda isə "Klaster silahlarla mülki bölgələrə atəş edilməsi" kəskin şəkildə pislənilir. Bununla yanaşı, Rusiya istehsalı olan 9M55 "Smerch" raketlərindən açılan atəş Bərdədə "Vice News"un müxbirləri tərəfindən də lentə çəkilib.

Açıqlamada o da qeyd olunur ki, "Kasetli sursatlardan mülki ərazilərə qarşı istifadə etmək amansızlıqdır və məsuliyyətsizlikdir. Bu, çoxsaylı insan itkisinə, yaralanmaya səbəb olur". Kasetli döyüş sursatlarının hər cür şəraitdə istifadəsi beynəlxalq humanitar hüquqa əsasən qadağandır. Bu faktın özü də təşkilat bəyanatında qeyd edilib".

Politoloq hesab edir ki, buradan bir şey məlum olur, o da dünya ictimaiyyətinin nəhayət ayılmasıdır: "Paşinyan ölkədə və orduda olan iflic vəziyyəti kütləvi informasiya vasitələrinə məhdudiyyət gətirməklə gizlətməyə çalışsa da bu cəhdlərin heç biri alınmadı. Artıq gündən-günə tənəzzül edən Ermənistanda nə baş verdiyinin hər kəs fərqindədir. Belə ki, illərlə orduları haqqında yaratdıqları “məğlubedilməz mif” Azərbaycanın mərd oğulları tərəfindən döyüş meydanında dağıdılırsa, diplomatiya və informasiya savaşında da əldə olunan uğurlar onların bir heç olduğunu dünyaya sübut edir.

Nəzərə alsaq ki, "Amnesty International" hər zaman qərəzli mövqe sərgiləyib, o zaman əminliklə deyə bilərik ki, Bərdə şəhərində yaşanan hadisələr barədə bəyanat bu istiqamətdə yeni bir mərhələnin başlanğıcından xəbər verir. Bu bəyanatlar dünyaya adətən bir hörümçək toru, zəhər tuluğu kimi səpələnmiş erməni lobbisinin, diaspora təşkilatlarının məğlubiyyətidir. İllərlə olmayan saxta tarixlərini, sahib olmadıqları torpağı mənimsəyərək dünyaya özlərininki kimi təqdim etmə cəhdlərinin iflasıdır".

Şəbnəm Həsənova əlavə edib ki, bu gün cənab Prezident başda olmaqla aparılan uğurlu siyasət nəticəsində erməni diaspora nümayəndələrinin illərlə qrantlarla, şirnikləndirici vədlərlə, hətta təhdid və hədələrlə etdikləri bütün cəhdlərin qarşısı əzmlə alınır:

"Bu cür təşkilatların isə Azərbaycan haqqında reallıqları görməyə başlaması bizim uğurumuzdur. Burada ən önəmli məsələ cənab Prezident İlham Əliyevin sentyabrın 27-dən başlayaraq gecə-gündüz demədən dünyanın aparıcı KİV-lərinə verdiyi silsilə, sistemli müsahibələr, səsləndiriləni məntiqli, inandırıcı arqumentlər, diplomatik müstəvidə yürüdülən səriştəli siyasət qəti olaraq sözünü dedi.

Artıq erməni şəbəkəsinin gerçəkləri gizlətməsi, Azərbaycan haqqında yalan informasiyalar yayaraq beynəlxalq ictimai rəyi çaşdırmasının qarşısı qəti olaraq alınır. Erməni barbarlığını özündə əks etdirən faktların kütləvi və sistemli şəkildə beynəlxalq təşkilatlara təqdim edilərək lazımi reaksiyaların göstərilməsi cənab Prezident başda olmaqla Azərbaycanın uğurudur.

Bu gün cənab Prezident həm orduda, həm diplomatik masada, həm də informasiya məkanında savaşır və əsl Ali Baş Komandan funksiyasının nə demək olduğunu bütün dünyaya nümayiş etdirir. Məhz bu baxımdan da Ali Baş Komandan başda olmaqla döyüş bölgəsində əsgər və zabitlərimiz, hərbi qulluqçularımız, siyasi və diplomatik sferada diplomat və siyasətçilərimiz, informasiya məkanında isə kütləvi informasiya vasitəsi sahəsində çalışan insanlarımız, ictimai xadimlərimiz, sosial şəbəkələrdə də ən az bu insanlar qədər gecə-gündüz mübarizə aparan sıravi vətəndaşımız Ermənistan və erməni üzərində qalibdir. Tezliklə Şuşa qələbəsini yaşamaq eşqi ilə..."

Orxan Hüseyn
BAKU.WS