"Səsimizi çıxarsaq, efirlərə qadağa ilə hədələyirlər" - Lalə Məmmədovadan ETİRAZ

"Biz sənətçilər toyun ümidi ilə yaşamamalıyıq".BAKU.WS xəbər verir ki, bu sözləri əməkdar artist Lalə Məmmədova sosial şəbəkədə yazıb. Ölkə başçısı İlham Əliyevin və vitse-prezident Mehriban Əliyevin mədəniyyət və incəsənət xadimlərilə görüşünə toxunaraq, milli estrada sahəsində də problemlərin olduğunu bildirib. Əməkdar artist dövlət konsertlərindəki çıxışlarına görə sənətçilərə heç vaxt qonorar verilmədiyi açıqlayıb:"Əziz prezidentim! Görkəmli incəsənət xadimlərimizlə sonuncu görüşünüz, yaşanan problemlər və onların aradan qaldırılması yolunda gördüyünüz işlər ürəkaçan və təqdirəlayiqdir. Ümid edirəm ki, gələn görüşdə mənə də imkan yaranar, mən də milli estrada sahəsi və bu sahədə fəaliyyət göstərən müğənnilərin yaşadıqları problemlər barədə sizə danışaram. Təəssüf ki, biz sənətçilər etdiyimiz çıxışlara və iştirak etdiyimiz konsertlərə görə, heç bir qonorar almırıq (solisti olduğum AzTV istisna olmaqla). İstər televiziya, istər radio, istər Bakı, istərsə də, rayonlarda açıq hava və ya qapalı konsertlərdən….Halbuki bu çıxışlara görə bizə az da olsa qonorar yazılır. Kimlərin cibinə və harasa gedən bu pullar haqda kimsə nəsə bilsə də, heç kəs heç nə deyə bilmir. Halbuki təşkil olunan bu tədbirlərə büdcədən sənətçilər üçün qonorar ayrılır.Səsimizi çıxarıb bir söz deyəndə, dediklərindən belə çıxır ki, hələ minnətimiz olsun ki, bizi efirlərə, konsertlərə buraxırlar. Yoxsa efirlərə qadağa qoyarlar, konsertlərə həsrət qalarıq. Əsl yaradıcılığı olan sənətçi efir vaxtını səmərəli şəkildə doldurduğu üçün qonorar almalıdır. Bunu hər kəs bilir, sadəcə heç bir sənətçi indiyədək açıq şəkildə danışmayıb. Bu gün bunu mən deyirəm, biz sənətçilər toyun ümidi ilə yaşamamalıyıq.Biz öz sənətimizlə az da, çox da olsa, zəhmətimizlə haqqımıza çatanı tələb edirik, başqasının zəhmətində isə gözümüz yoxdur. Axı sənətçi başqa sənətlə məşğul ola bilmir. Məgər bütün müğənnilər toya gedib pul qazana bilir? Qazananlar da bir külfət ailə dolandırır. Bu gün milli estrada sahəsində də bu cür çirkin oyunlar oynanılır. Cənab prezident, viste –prezident! Sizin ölkəmiz naminə gördüyünüz hər bir uğurlu iş bizim gələcəyimiz üçündür. Bunu anlayır və sizi dəstəkləyirik. Ümid edirik ki, sadaladığımız bu problemlər sizin nəzərinizdən qaçmayacaq, digər incəsənət məsələləri kimi bunun da həlli sizin sayənizdə yolunu tapacaq”.Zülfiyyə QurbanovaBAKU.WS