Fransada arvadını on il zorlayan şəxs mühakimə olunur

Fransada 71 yaşlı Dominik P. adlı kişi həyat yoldaşına qarşı ağır cinsi cinayətlər törətdiyinə görə mühakimə olunur.

BAKU.WS xarici mətbuata istinadən xəbər verir ki, təqsirləndirilən şəxs on ildən artıq müddətdə həyat yoldaşına sistematik şəkildə cinsi təcavüz etməkdə və onlarla kişini bu hücumlarda iştirak etmək üçün təşkilatçılıqda ittiham olunur.

İddiaya görə, Dominik P. yoldaşına bir neçə dəfə narkotik verib, huşunu itirib və internet vasitəsilə tanımadığı kişilərlə əlaqə saxlayıb və onları evinə dəvət edib. Həmin şəxslər qadına cinsi təcavüz ediblər.

Qadının vəkilləri müvəkkilinin bu proses zamanı baş verənlərdən tamamilə xəbərsiz olduğunu bildiriblər. İstintaq çərçivəsində polis ən azı 92 zorlama hadisəsində 72 müxtəlif kişinin əli olduğunu müəyyən edib. Həmin şəxslərdən 50-nin şəxsiyyəti müəyyən edilib və müttəhimlə birlikdə mühakimə olunur.

Zərərçəkmiş qadın 2020-ci ildə baş verənlərdən polisə məlumat verdikdən sonra xəbər tutub. Vəkili bu işin qadın üçün "dəhşətli sınaq" olacağını və ilk dəfə bu hücumların video çəkilişlərinə baxacağını bildirib.

Polis müttəhimin 2020-ci ilin sentyabrında alış-veriş mərkəzində qadınların ətəklərini gizli şəkildə lentə alarkən həbs edildiyini bildirib. Araşdırma nəticəsində, kişinin kompüterində arvadının huşsuz halda çəkilmiş yüzlərlə foto və videosu tapılıb. İddia olunur ki, bu görüntülər cütlüyün evində baş verən çoxsaylı cinsi zorakılıqları əks etdirir. Hücumların 2011-ci ildə başladığı güman edilir. Dominik P. də bu hücumları qeydə aldığını etiraf edib.