DSX İrandan Azərbaycana narkotik keçirənləri saxladı - FOTO

Dövlət Sərhəd Xidməti tərəfindən dəniz sərhədlərinin etibarlı mühafizəsi, Xəzər dənizinin Azərbaycan Respublikasına mənsub bölməsində rejim qaydaları­na nəzarətin gücləndirilməsi və qaçaqmalçılığa qarşı mübarizə üzrə zəruri tədbirlər davam etdirilməkdədir.

Dövlət Sərhəd Xidmətindən BAKU.WS-ə verilən məlumata görə, 29 dekabr tarixində Xəzər dənizinin cənub istiqamətində dövlət sərhədinin mühafizəsi üzrə xidməti təşkil edən sərhəd gözətçi gəmisi tərəfindən Neftçala ra­yo­­nunun Həsənabad kəndi istiqamətində 2 üzmə vasitəsi müşahidə olunmuş, tanınma üçün zəruri tədbirlər həyata keçirilərək hər birində 2 nəfər heyət üzvü olan “Bayda” tipli üzmə vasitələri olmaları müəyyən edilmişdir. Sərhəd gözətçi gəmisinin “Dayan” komandasına tabe olmayan şəxslər üzmə vasi­təsinin sürətini artıraraq ərazidən şərqə doğru uzaqlaşmağa cəhd etmiş, əlavə iki sərhəd gözətçi gəmisinin cəlb olunduğu axtarış-təqibetmə əməliyyatı nəticəsində baydalar sahil nəzarəti böl­mələri ilə qarşılıqlı əlaqədə saxlanılmışlar.

Qeyri-qanuni olaraq baydalarda rejim sularına çıxmış şəxslərin Neftçala şəhər sakinləri 1982-ci il təvəllüdlü İsayev Taleh Tahir oğlu, 1977-ci il təvəllüdlü İsayev Rahim Tahir oğlu, Neftçala rayonunun Bankə qəsəbəsinin sakinləri 1977-ci il təvəl­lüdlü Nağıyev Sulduz Ayaz oğlu və 1977-ci il təvəllüdlü Əliyev Xəyyam Bəxtiyar oğlu olmaları müəyyənləşdirilmişdir.

Həmin gün sərhəd gö­zətçi gəmisi tərəfindən Neftçala rayonunun Şirvanlı kən­di istiqamətində sutkanın qaranlıq vaxtı 3 ədəd kiçik həcmli üzmə vasitəsi aşkar olunmuşdur. Sərhəd gözətçi gəmisinin “Dayan” komandasına tabe olmayaraq sü­rəti artırmaqla cənub-şərqə doğru ərazidən uzaqlaşan üzmə vasitələri təqib edil­miş, hərəkət zamanı həmin üzmə vasitələrindən dənizə qutuya bənzər əşyaların atılması müşahidə olunmuşdur.

Qaranlıq hava şəraitində dənizə atılmış əşyaların axtarışı üçün digər sərhəd gözətçi gəmisi cəlb olunmuş, təqibi davam etdirilən kiçik həcmli üzmə vasitələri cənub-şərq istiqamətində Azərbaycan Respublikasının ərazi sularını tərk edərək müşahidədən itmişlər. Naməlum əşyaların atıldığı dəniz sahəsinə baxış nəticəsin­də 60 qutu aşkarlanmış, qutuların içərisində 5916 blok, hər blokda 10 ədəd olmaqla 59160 ədəd müxtəlif növ siqaret olduğu müəyyən edilmişdir.

Bununla yanaşı Xəzər dənizinin cənub istiqamətində İran İslam Respubli­kasından qaçaqmalçılıq yolu ilə Azərbaycan Respublikasına narkotik vasitələrin keçirilməsinin qarşısı alınmış, dəniz istiqamətləndirici nişanına bağlanmış 1 ədəd selofan torbanın içərisində ümumi çəkisi 745 qram narkotik vasitəyə (515 qram marixuanaya, 230 qram heroinə) oxşar maddə aşkar edilərək götürülmüşdür.

Qeyd edilən bütün faktlar üzrə əməliyyat-istintaq tədbirləri davam etdirilir.

Qalereya