Ata və azyaşlı qızı döyüldü, şübhəli həbs edildi

Türkiyənin Yalova vilayətinin Çınarcıq rayonunda ata və 14 aylıq qızı qonşularının hücumuna məruz qalıb. Hadisə zamanı ata və körpə müxtəlif dərəcəli xəsarətlər alaraq xəstəxanaya yerləşdirilib.

BAKU.WS xəbər verir ki, ilkin məlumata görə, tərəflər arasında uzun müddətdir davam edən münaqişə olub. Ata jandarmaya müraciət etdikdən sonra, qucağında azyaşlı övladı olduğu halda odun parçası ilə hücuma məruz qalıb. Nəticədə körpənin kəllə sümüyündə çat, atanın isə burun nahiyəsində sınıq qeydə alınıb.

Hadisə ilə bağlı cinayət işi başlanıb. Hücumda şübhəli bilinən şəxs məhkəmə qərarı ilə həbs edilib. Rəsmi qurumlar araşdırmanın davam etdiyini bildirir.