Qarlı və şaxtalı hava nə qədər davam edəcək? - RƏSMİ AÇIQLAMA - FOTO

"Azərbaycana soyuq hava kütlələrinin daxil olması nəticəsində hava şəraiti kəskin dəyişib. Demək olar ki, respublikanın əksər rayonlarında qar yağıb. Bakı və Abşeron yarımadasında əmələ gələn qar örtüyünün hündürlüyü 5 santimetrə yaxınlaşıb".

Bunu BAKU.WS-ə Milli Hidrometeorologiya Xidmətinin direktoru Umayra Tağıyeva bildirib.

Onun sözlərinə görə, ən çox qar respublikanın Böyük Qafqaz rayonlarında qeydə alınıb ki, burada əmələ gələn qar örtüyünün hündürlüyü yarım metrə çatıb: "Bu proses güclü külək və çovğunla müşahidə olunub. Küləyin maksimal sürəti rayonlarda 28 m/s, Bakı və Abşeron yarımadasında isə 25-28 m/s çatıb ki, bu da açıq dənizdə dalğanın 6 metrə qədər inkişafına qədər səbəb olub.

Respublika ərazisində gün ərzində əlverişsiz hava şəraiti davam edəcək, fasilələrlə qar yağacaq, bəzi rayonlarda intensiv olacaq. Ayın 25-də səhər saatlarından başlayaraq proses səngiyəcək, yağıntılar tədricən kəsiləcək".