Bankda manatla pulu olanlara şad xəbər

Azərbaycanın kommersiya bankları manatla qəbul etdikləri əmanətləri bahalaşdırmaqda davam edir. Son bir ayda daha 7 bank milli valyutada yerləşdirilən əmanətlərinin illik faiz dərəcəsini artırıb. Söhbət həm klassik, həm də yığım əmanətlərindən gedir.

BAKU.WS "Turan”a istinadən xəbər verir ki, manat əmanətlərinin 1 illik müddətə gəlirliliyi "Atabank”da 10,5-12%-dən 13,5-15%-ə, "Azər-Türk Bank”da 6,5-7%-dən 10-10,5%-ə, "Bank Avrasiya”da 7-10%-dən 10-13%-ə, "Bank of Baku”da 12-13%-dən 13,5-14%-ə, "Bank VTB (Azərbaycan)”da 12-14%-dən 15-16%-ə, "Turanbank”da isə 13-13,4%-dən 16-16,5%-ə yüksəlib.

Əvəzində yerli banklar xarici valyutada, əsasən, ABŞ dollarında qəbul etdikləri əmanətləri ucuzlaşdırmaqda davam edir. Son bir ayda daha 7 bank Amerika valyutasında yerləşdirilən əmanətlərin illik faiz dərəcəsini azaldıb.

Belə ki, dollarla əmanətlərinin 1 illik müddətə gəlirliliyi "Bank Avrasiya”da 2,75-3%-dən 2-2,25%-ə, "Bank VTB (Azərbaycan)”da 4-4,5%-dən 3-3,5%-ə, "Kapital Bank”da 1,5-2%-dən 1-1,2%-ə, "Unibank”da 4,5-4,75%-dən 3-3,1%-ə, "Yapı Kredi Bank (Azərbaycan)”da isə 2,5%-dən 1,5%-ə (faizlər aylıq ödənildiyi halda) düşüb.

Banklar arasında avro ilə qəbul etdikləri əmanətləri ucuzlaşdıranlar da var. Məsələn, son bir ayda "Bank Avrasiya”da avro əmanətlərinin 1 illik müddətə gəlirliliyi 0,5-1%-dən 0,25-0,5%-ə düşüb. Bəzi banklar, məsələn, "Unibank” isə Avropanın vahid valyutasında əmanət qəbulunu dayandırıb.

BAKU.WS