Azərbaycan peyk xidmətlərinin ixracından əldə olunan gəliri artırır

Azərbaycanın "Azərkosmos" ASC-nin 2020-ci ilin yanvar-noyabr aylarında peyk və telekommunikasiya xidmətləri ixracından əldə etdiyi gəlirin həcmi 41,3 milyon dollar təşkil edib ki, bu da 2019-cu ilin eyni göstəricisindən iki faiz çoxdur.

BAKU.WS Trend-ə istinadla xəbər verir ki, bu barədə Azərbaycan İqtisadi İslahatların Təhlili və Kommunikasiya Mərkəzinin "İxracat İcmalında" deyilir.

Məlumata əsasən, "Azərkosmos"un xidmətlər ixracından əldə etdiyi mənfəət kosmik operatorun ümumi gəlirinin 90 faizini təşkil edib.

2020-ci ilin yanvar-noyabr aylarında İngiltərə, ABŞ, Fransa, Malayziya və BƏƏ də daxil olmaqla 30 ölkəyə xidmətlər göstərilib.

2020-ci ilin noyabr ayında səhmdar cəmiyyəti 20 ölkəyə 3,5 milyon dollarlıq xidmət ixrac edib.

Xatırladaq ki, "Azərkosmos" iki rabitə (Azerspace-1, Azerspace-2) və aşağı orbitli (Azersky) peyklərinin işini aparır.

2019-cu ilin nəticələrinə əsasən şirkətin peyk və telekommunikasiya xidmətləri ixracatından əldə etdiyi gəlir 43,4 milyon dollar təşkil edib ki, bu da 2018-ci ilin eyni dövrü ilə müqayisədə yüzdə 70 çoxdur.