Sudanın paytaxtı Xartumda hava hücumu: 10 nəfər ölüb, 30 nəfər yaralanıb

Sudanın paytaxtı Xartumun cənubunda həyata keçirilən hava hücumu nəticəsində ən azı 10 nəfər həlak olub, 30 nəfər isə yaralanıb. Hücumun Al-Sahrij stansiyasını hədəf aldığı bildirilir.

BAKU.WS xəbər verir ki, Cənubi Xartum Təcili Yardım Xidmətindən verilən açıqlamaya görə, hücum Xartumun cənubunda yerləşən Mayo məhəlləsində baş verib:

"Al-Sahrij stansiyasını hədəf alan hava hücumu nəticəsində 10 nəfər həyatını itirib, 5-i birinci dərəcəli yanıq olmaqla 30 nəfər yaralanıb".

Açıqlamada qeyd olunub ki, Al-Sahrij stansiyası bir ay ərzində artıq üçüncü dəfə bombalanır. Ərazidə bazar və çoxlu restoranların yerləşməsi səbəbindən hücum zamanı çox sayda mülki şəxsin olduğu bildirilib.

"Al-Rakoba" xəbər portalının məlumatına əsasən, yaralananların əksəriyyəti hadisə yerindən təxminən 4 kilometr məsafədə yerləşən Beşir Xəstəxanasına çatdırılıb. Hücuma görə məsuliyyəti isə hələ heç bir tərəf üzərinə götürməyib.