Pis yuxu insanları görün nələrə sövq edir - Araşdırma

Nottingem Universitetinin alimləri müəyyən ediblər ki, pis yuxu keyfiyyəti insanların konspirasiya nəzəriyyələrinə daha həssas olmasına səbəb ola bilər və bu əlaqədə əsas rolu depressiya oynayır.

BAKU.WS xəbər verir ki, araşdırmanın nəticələri "Journal of Health Psychology" (JHP) jurnalında dərc olunub.

Tədqiqatın ilk mərhələsində 540 yetkin könüllü Notr Dam yanğını haqqında məqaləni oxumazdan əvvəl standartlaşdırılmış yuxu keyfiyyətinin qiymətləndirilməsini tamamlayıb. Onlardan bəzilərinə yanğınla bağlı məlumatın qəsdən gizlədildiyini iddia edən versiya təqdim edilib. İkinci qrup yanğını qəza kimi izah edən faktiki məqalə oxuyub. Araşdırma göstərib ki, yuxu keyfiyyəti aşağı olan insanlar konspirasiya nəzəriyyəsinə inanmağa daha meyilli olublar.

575 nəfərin iştirak etdiyi ikinci araşdırma bu nəticələri təsdiqləyib. Məlum olub ki, yuxusuzluq və digər yuxu problemləri konspirativ düşüncə tərzi ilə müsbət əlaqəlidir. Bu prosesdə isə əsas mexanizm kimi depressiya çıxış edir. Konspirasiya nəzəriyyələrinin tərəfdarları eyni zamanda daha çox qəzəb və paranoya nümayiş etdiriblər, lakin bu amillərin təsiri daha qeyri-sabit olub.