Mark Zukerberq Instagram-ın inkişafını əngəlləməkdə ittiham olundu

ABŞ Federal Ticarət Komissiyasının (FTC) "Meta" şirkətinə qarşı açdığı məhkəmə prosesində Instagram-ın həmtəsisçisi Kevin Sistrom ifadə verib.

BAKU.WS xəbər verir ki, bu barədə "The Verge" nəşri yazıb.

Kevin Sistrom bildirib ki, 2012-ci ildə fotoşəkil paylaşım platforması "Meta" tərəfindən alındıqdan sonra şirkətin rəhbəri Mark Zukerberq bilərəkdən Instagram-ın inkişafını məhdudlaşdırıb.

Onun sözlərinə görə, Zukerberq "Instagram" üçün həyati əhəmiyyət daşıyan resurslar və investisiyaların ayrılmasına mane olub. O, Facebook-un əsas sosial şəbəkə kimi populyarlığının zərər görəcəyindən ehtiyatlanıb.

Instagram-a hətta video məzmunun inkişafı və ya istifadəçi təhlükəsizliyinin təmin olunması kimi prioritet sahələrdə belə, Facebook-la müqayisədə daha az maliyyə və insan resursu ayrılıb.

Sistrom həmçinin deyib ki, "Instagram" "Facebook" üçün ciddi rəqibə çevrilməyə başladıqda hər iki platformanın qarşılıqlı inkişafına şərait yaradan funksiyalar (məsələn, kross-postinq) da Zukerberq tərəfindən dayandırılıb.

Məhkəmədə Sistrom o fikri də səsləndirib ki, "Instagram" müstəqil şəkildə də böyük uğur qazana bilərdi. O və digər həmtəsisçi Mayk Kriger 2018-ci ildə şirkətdən ayrılıblar. Onlar Zukerberqin xidmətin gündəlik idarəçiliyinə müdaxiləsindən və Instagram-a kifayət qədər investisiya qoymaq istəməməsindən narazı olduqlarını bildiriblər.

Sistromun açıqlamaları, Mark Zukerberqin daha əvvəl məhkəmədə dedikləri ilə ziddiyyət təşkil edir. Zukerberq iddia edib ki, Instagram-ın uğur qazanmasında Facebook-un resursları və infrastrukturu əsas rol oynayıb.

Qeyd edək ki, məhkəmə prosesi hələ də davam edir.

Xatırladaq ki, bu yaxınlarda Instagram-da videolar üçün yeni funksiya istifadəyə verilib.