Yayda gəzməyə və istirahətə gedərkən ehtiyatlı olun - İflic ola bilərsiz

Yay fəslində insanların həyatı üçün təhlükə yaradan məsələlərdən biri həşəratlardır. Ən təhlükəli hesab olunan həşərat növlərindən biri də gənələrdir.

Gənə – zahirən kiçik və zərərsiz görünən bir parazitdir. Ancaq bu xırda canlı insan sağlamlığı üçün son dərəcə ciddi təhlükələr yarada bilər və hətta ölümcül nəticələrə səbəb ola bilər.

Gənələr xüsusilə yaz və yay aylarında aktivləşirlər. İnsanlar bu dövrdə daha çox təbiətə çıxır və risk artır. Gəlin, bu parazitlərlə bağlı ən qorxulu faktlara nəzər salaq.

Tək bir dişləmə – həyat boyu problem

Gənələr bir çox təhlükəli xəstəliklərin daşıyıcısıdır. Ən qorxuluları arasında gənə ensefaliti və Laym xəstəliyi (borrelioz) var. Bu infeksiyalar sinir sisteminə, ürəyə, oynaq və əzələlərə ciddi zərər vurur. Laym xəstəliyi özünü digər xəstəliklər kimi büruzə verə bilər və illərlə insan sağlamlığını içdən məhv edə bilər – özü də fərqinə varmadan.

İflic riski

Bəzi gənə növlərinin ifraz etdiyi toksinlər insanda iflic yarada bilər. Bu nadir, lakin son dərəcə təhlükəli haldır. Zərərli maddələr əzələlərin və sinir sisteminin fəaliyyətini pozur. Ən ağır hallarda isə nəfəs alma əzələlərinə təsir göstərir və həyat üçün birbaşa təhlükə yaradır.

Gənələr yalnız meşədə olmur

İnsanlar çox zaman gənələrin yalnız meşələrdə olduğunu düşünür. Əslində isə onlar şəhər parklarında, bağ evlərində, evlərin ətrafında olan otluq ərazilərdə və heyvanların üzərində də tapıla bilər. Gənələr səhər və axşam saatlarında daha fəaldırlar.

Görünmədən hücum edirlər

Gənə bədənə yapışaraq saatlarla, bəzən günlərlə özünü hiss etdirməyə bilər. Onlar dişlədikləri yerə ağrı hissini azaldan maddə ifraz etdiklərindən insan heç nə hiss etmir. Bu səbəbdən gənə bədəndə uzun müddət qaldıqda daha ciddi təhlükə yaranır.

İllərlə davam edən infeksiyalar

Gənələrin ötürdüyü bəzi xəstəliklər bir neçə ay və ya il sonra özünü büruzə verə bilər. Nəticədə insan bu xəstəliklərin gənə ilə əlaqəli olduğunu belə düşünmür. Bu isə diaqnostikanı və müalicəni çətinləşdirir.

Ölüm halları az deyil

Gənə ensefalitinin ağır formaları ölümcül ola bilər. Xüsusilə yaşlı insanlar və uşaqlar bu baxımdan risk altındadır. Ölüm halları nadir olsa da, sənədləşdirilmiş real faktlardır.

Gənəni özbaşına çıxarmaq təhlükəlidir

Ən geniş yayılmış miflərdən biri budur ki, gənəni sadəcə dartmaqla çıxarmaq olar. Halbuki bu, böyük səhvdir. Gənənin bədəndə bir hissəsi qalarsa, bu infeksiya üçün açıq qapı deməkdir. Gənəni düzgün şəkildə, steril alətlə çıxarmaq və ya tibbi yardım almaq şərtdir.

Ehtiyatlı olmaq həyat qurtarır

Gənələri kiçik görməyin. Onlar azacıq diqqətsizliyinizdən istifadə edib sağlamlığınıza illərlə davam edən zərər vura bilərlər.

Onlara qarşı ən yaxşı silah məlumatlılıq, qorunma tədbirləri və diqqətdir.

Qorunma yolları

Uzunqollu geyim geyin

Təbiətə çıxarkən bədəni ört

Repellentlərdən istifadə et

Geri döndükdə dərini və geyimi diqqətlə yoxla.