İlon Mask "OpenAI"yə qarşı məhkəmə iddiasını uduzub

Bazar ertəsi ABŞ məhkəməsi sahibkar İlon Mask tərəfindən qaldırılmış iddia üzrə "OpenAI" şirkətinin xeyrinə qərar çıxarıb.

BAKU.WS "Report"a istinadən xəbər verir ki, məhkəmə qərara alıb ki, süni intellektin hazırlanması ilə məşğul olan şirkət guya bəşəriyyətə fayda vermək kimi ilkin missiyasından uzaqlaşdığına görə Mask qarşısında məsuliyyət daşımır.

Oklend (Kaliforniya ştatı) Federal Məhkəməsinin münsifləri yekdilliklə qərara alıblar ki, Mask iddianı çox gec qaldırıb.

Qeyd edək ki, məhkəmə prosesi aprelin 28-də başlayıb. Əsas qarşıdurma Maskla "OpenAI"nin baş icraçı direktoru Sem Altman arasında baş verirdi.

Bir çoxları bunu "OpenAI" və bütövlükdə süni intellektin gələcəyi üçün onun necə istifadə edilməli olduğu, həm də ondan kimin fayda əldə etməli olduğu baxımından dönüş nöqtəsi hesab edirlər.

Mask "OpenAI" şirkətini qeyri-kommersiya təşkilatı hesabına investorları və insayderləri qanunsuz olaraq zənginləşdirməyə cəhd etməkdə və süni intellektin təhlükəsizliyinə lazımi diqqət yetirməməkdə günahlandırıb. O həmçinin bildirib ki, "Microsoft" ən başından "OpenAI"nin xeyirxah məqsədlərdən çox pula önəm verdiyini bilirdi.

"OpenAI" isə etiraz edərək bildirib ki, məhz Mask layihədə "qazanclı perspektivlər" görüb və "OpenAI"nin bəşəriyyətin rifahı naminə təhlükəsiz süni intellektin yaradılması barədə əsas sazişi pozduğunu bəyan etməzdən əvvəl uzun müddət gözləyib.

"OpenAI" süni intellekt sahəsində "Anthropic" və "xAI" kimi şirkətlərlə rəqabət aparır və şirkəti 1 trilyon dollar dəyərində qiymətləndirə biləcək mümkün ilkin kütləvi səhm yerləşdirməsinə hazırlaşır.

"Microsoft" rəhbərlərindən birinin sözlərinə görə, şirkət "OpenAI" ilə tərəfdaşlığa 100 milyard dollardan çox vəsait xərcləyib.

Maska məxsus "xAI" isə indi onun "SpaceX" kosmik və raket şirkətinin bir hissəsidir ki, bu şirkət də miqyasına görə "OpenAI"nin İlkin Kütləvi Təklifini (IPO) üstələyə biləcək IPO-ya hazırlaşır.