Altsheymer və Parkinson xəstəliklərinin ortak səbəbi tapıldı

Professor Deyvis Cozefin sensasiyalı bəyanatı neyrodegenerativ xəstəliklər barədə təsəvvürləri alt-üst edir və Altsheymer və Parkinsonla mübarizədə yeni dövrün başlanğıcını vəd edir.

TİBBDƏ ƏHƏMİYYƏTLİ KƏŞF

Elm dünyası qlobal dəyişikliklərin astanasındadır! Artıq adı elmi sıçrayışla sinonimə çevrilən professor Deyvis Cozef, Altsheymer və Parkinson xəstəliklərinin - indiyədək ayrı-ayrılıqda araşdırılan iki ən dağıdıcı neyrodegenerativ xəstəliyin - ortaq səbəbini tapdığını açıqlayıb. Bu kəşf təkcə əlaqə qurmaqla kifayətlənmir, həm də bu patologiyaların əsasında duran universal bir mexanizmi göstərir.

İKİ XƏSTƏLİYİN ORTAQ KÖKÜ

İndiyədək Altsheymer və Parkinson xəstəlikləri paralel olaraq, onların özünəməxsus simptomlarına diqqət yetirməklə araşdırılırdı. Lakin professor Cozef və onun komandasının International Journal of Molecular Sciences jurnalında dərc olunan işi göstərdi ki, hər iki xəstəliyin əsas səbəbi deamidasiyaya bağlı eyni zülalın disfunksiyasıdır. Bu, yaşlanmanın həmin zülalın düzgün işləməməsinə səbəb olduğunu, nəticədə isə zədələnmiş strukturların toplanaraq beyin hüceyrələrinin ölümünə gətirib çıxardığını göstərir. Deamidasiyanın səviyyəsinin normaya qaytarılması xəstəliyin inkişafını dayandıra bilər.

ELMLƏRİN SİNERGİYASI: ANLAYIŞ VƏ MÜALİCƏYƏ YENİ YANAŞMA

Bu fenomenal kəşf elmin dörd əsas sahəsini birləşdirir:

Deamidasiyanın biokimyası: amin qrupunun molekuldan ayrıldığı proses, bu da zülalların struktur və funksiyalarını dəyişə bilər.

Translyasiya nəzarəti: hüceyrədə zülal sintezini tənzimləyən mexanizmlər, xüsusən də bu prosesdə kritik rol oynayan 4E-BP2 zülalı.

Oksidləşdirici stress: sərbəst radikalların istehsalı ilə orqanizmin onları neytrallaşdırma qabiliyyəti arasındakı balanssızlıq, nəticədə hüceyrə zədələnməsi.

Neyrodegenerasiya: sinir hüceyrələrinin tədricən ölümü.

Bu kompleks qarşılıqlı əlaqənin anlaşılması simptomlara deyil, birbaşa xəstəliklərin ilkin səbəbinə yönələn hədəfli müalicə metodlarının inkişafı üçün misilsiz imkanlar yaradır.

GƏLƏCƏK PERSPEKTİVLƏRİ: KLINİK SINAQLAR VƏ POTENSİAL RİSKLƏR

Professor Cozef yalnız nəzəriyyə irəli sürməklə kifayətlənmir, həm də yeni terapiyanın əsasını təşkil edə biləcək konkret mexanizm təklif edir. Hal-hazırda alimlər insan üzərində klinik sınaqların başlanmasını səbirsizliklə gözləyirlər.

Qeyd olunmalıdır ki, istənilən yeni müalicə üsulu kimi, bu da digər zülallara təsir və ya 4E-BP2 tənzimlənməsinin uzunmüddətli nəticələri kimi gözlənilməz təsirləri üzə çıxara bilər. Lakin bu kəşfin potensial faydası milyonlarla insanın həyatını dəyişdirə bilər.