Alimlər: Yataqda telefonla keçən hər saat yuxusuzluq riskini 60%-ə qədər artırır

Sosial şəbəkələrdə vaxt keçirmək vərdişi yuxuya mənfi təsir göstərə bilər.

BAKU.WS xəbər verir ki, norveçli alimlər bununla bağlı "Frontiers in Psychiatry" jurnalında yeni araşdırma dərc ediblər. 18-28 yaş arası 45 mindən çox insanın iştirak etdiyi tədqiqatın nəticələrinə görə, yataqda telefon istifadəsi yuxunun müddətini azaldır və yuxusuzluq riskini artırır.

Araşdırmaya əsasən, yataqda telefonla keçən hər saat yuxunu 24 dəqiqə qısaldır və beynin rahatlanmasını çətinləşdirir. Bundan əlavə, yuxusuzluq riski 59% artır. Davamlı yuxusuzluq isə ürək-damar xəstəlikləri, diabet və yüksək təzyiq kimi xroniki xəstəliklərə yol aça bilər.

Alimlər bildiriblər ki, insanlar telefonlarını necə istifadə etmələrindən asılı olmayaraq, bu vərdiş onların yuxu keyfiyyətini pisləşdirir və yuxu müddətini azaldır.