"Barselona" El Klassiko tarixində unikal nailiyyətə imza atıb

Bazar günü, yanvarın 12-də İspaniya Superkubokunun final matçı baş tutdu və "Real Madrid" və "Barselona" komandaları qarşılaşdı.

Komandalar Səudiyyə Ərəbistanının Ciddə şəhərindəki neytral "King Abdullah Sports City" stadionunda üz-üzə gəldilər. Matç sonrası "Barselona" meydançanı inamlı qələbə ilə tərk etdi.

BAKU.WS "Opta Sport"a istinadən xəbər verir ki, "Barselona" "Real Madrid"i 5:2 hesabı ilə darmadağın edib və "Los Blancos"la qarşılaşma tarixində unikal rekorda imza atıb.

Bu, "El-Klasiko" tarixində ilk dəfədir ki, "Barselona" ardıcıl iki matçda dörd və ya daha çox qol vurur. Flikin komandası La Liqanın 11-ci turunda "Real Madrid"lə əvvəlki matçda 4:0 hesabı ilə qalib gəlib.

Sonuncu dəfə bir komanda bunu 1963-cü ildə bacarmışdı, o zaman "Real" "Barselona"nı ardıcıl iki dəfə (5:1, 4:0) məğlub etmişdi.