Yaz aylarında baş ağrıları niyə artır? - Səbəblər və tövsiyələr

Yaz aylarında bir çox insanda baş ağrıları və miqren tutmaları daha tez-tez müşahidə olunur. Bunun əsas səbəbləri temperatur dəyişiklikləri, atmosfer təzyiqinin dalğalanması, gün işığının uzanması və bitki tozlarına qarşı allergiyaların artmasıdır.

BAKU.WS-in məlumatına görə, bu amillər mərkəzi sinir sisteminə təsir edərək ağrı tutmalarını gücləndirə bilər.

Simptomların azaldılması üçün xəstələrə fərdi müalicə proqramı təyin olunur. Bu proqram çərçivəsində müxtəlif dərmanlardan istifadə edilə bilər. Tutma zamanı isə xüsusi preparatlar və iltihabəleyhinə vasitələr tətbiq olunur. Lakin dərman seçimi mütləq həkim məsləhəti ilə aparılmalıdır.

Həkimlər miqren gündəliyi aparmağı da tövsiyə edir. Bu gündəlikdə tutmanın vaxtı, səbəbləri, müşahidə olunan əlamətlər, qəbul edilən dərmanlar və onların təsiri qeyd olunmalıdır. Bu, müalicənin daha düzgün seçilməsinə kömək edir.

Dərmansız üsullar da mühüm rol oynayır. Mütəxəssislər düzgün qidalanma rejiminə əməl etməyi, kofein, spirtli içkilər, fastfud və bəzi qatqı maddələrindən uzaq durmağı məsləhət görür. Gündəlik 7-8 saat yuxu və həftədə 3-4 dəfə, təxminən 30 dəqiqəlik orta intensivlikdə fiziki aktivlik (məsələn, gəzinti və üzgüçülük) tutmaların azalmasına kömək edə bilər.

Alternativ üsul kimi akupunktura da bəzi hallarda faydalı hesab olunur. Bununla yanaşı, bəzi qida əlavələrinin təsiri hələ tam elmi şəkildə sübut olunmayıb.

Mütəxəssislər tez-tez miqren yaşayan şəxslərə mütəmadi olaraq nevroloqa müraciət etməyi tövsiyə edir. Xüsusilə çox güclü və qeyri-adi baş ağrısı, 50 yaşdan sonra ilk dəfə yaranan ağrılar və ya huşun itməsi, nitq və görmə pozuntuları, ətraflarda zəiflik və yüksək hərarət kimi əlamətlər müşahidə olunarsa, dərhal həkimə müraciət olunmalıdır.