Xəzərdə külək enerjisi potensialını öyrənmək üçün yol xəritəsi hazırlanır

Beynəlxalq Maliyyə Korporasiyası (IFC) ilə əməkdaşlıq çərçivəsində Azərbaycanın dənizdə külək enerjisi potensialının tədqiq olunması üçün yol xəritəsi hazırlanır.

BAKU.WS Trend-ə istinadən xəbər verir ki, bunu Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Təbriz Əmmayev Qaradağda media-tur zamanı deyib.

Onun sözlərinə görə, bu istiqamətdə əməkdaşlıqla bağlı bir sıra özəl şirkətlərlə sazişlərin imzalanması istiqamətində işlər görülür.

Agentlik direktoru əlavə edib ki, ötən gün Bakıda BƏƏ-nin "Masdar" şirkəti ilə imzalanmış memorandum çərçivəsində elektrik enerjisi istehsalı və ixracı, eləcə də dənizdə külək enerjisinin gələcək inkişafı istiqamətində tədiqat işlərinin aparılması planlaşdırılır.