Türkiyə-Azərbaycan Universitetinə qəbulun ilkin nəticələri açıqlandı

Türkiyə-Azərbaycan Universitetinə tələbə qəbulunun ilkin nəticələri açıqlanıb.

BAKU.WS "qafqazinfo"-ya istinadən xəbər verir ki, bu barədə Texniki Universitetə rektoru Vilayət Vəliyev öz sosial şəbəkə hesabında yazıb.

O qeyd edib ki, nəticələr gözləniləndən də yüksək olub: “Kompüter mühəndisliyi: ən yüksək nəticə - 684.9, ən aşağı nəticə 641.6, Sənaye mühəndisliyi: ən yüksək nəticə 663.7; ən aşağı nəticə 544.4, Qida mühəndisliyi: ən yüksək nəticə 632.8; ən aşağı nəticə 452.1.”

Qeyd edək ki, Türkiyə-Azərbaycan Universitetinə hələ ki, rektor təyin edilməyib. Sözügedən ali məktəbə rəhbərlik müvəqqəti olaraq Azərbaycan Texniki Universitetinin (AzTU) rektoru Vilayət Vəliyevə həvalə olunub.

Xatırladaq ki, Türkiyə-Azərbaycan Universitetinin yaradılması ilə bağlı 2024-cü il fevralın 19-da Azərbaycanın Elm və Təhsil Nazirliyi ilə Türkiyənin Ali Təhsil Şurası arasında Anlaşma Memorandumu imzalanıb. Memorandumu Azərbaycanın elm və təhsil naziri Emin Əmrullayev və Türkiyənin Ali Təhsil Şurasının sədri Erol Özvar imzalayıblar.

TAU Bakı Ali Neft Məktəbinin (BANM) Xocalı prospektində yerləşən keçmiş binasında fəaliyyət göstərəcək.