Koronavirusa yoluxan Xalq artisti: "Sonuncu tamaşanı oynadıq, evə gələndə öskürək..."

Xalq artisti Rafiq Əzimov bir neçə gün əvvəl koronavirusa yoluxub.

Bu haqda BAKU.WS-ə danışan aktyor hazırda özünü yaxşı hiss etdiyini və koronavirus testinin cavabını gözlədiyini deyib:

"İki gün əvvəl müalicəm bitdi. İndi koronavirus testi vermişəm. Nəticəsini gözləyirəm. 1 həftəlik müalicə müddətini evdə keçirdim. Evdəyəm, heç yerə getmirəm. İlk dəfədir, koronavirusa yoluxmuşam. Teatrda işləyən bəzi aktyorlarımız xəstə idi. Sonuncu tamaşanı yanvarın 21-də oynadıq. Evə gələndə öskürək başaldı. Xəstələndiyimi anladım. Test verdim, pozitiv çıxdı. Evdə müalicə müddəti başladı".

Qeyd edək ki, Rafiq Əzimov ilk dəfə 1962-ci ildə Azərbaycan Akademik Milli Dram Teatrının truppasına qəbul olunub. Həmin dövrdən fasiləsiz olaraq bu teatrın səhnəsində çalışır.

Onu da bildirək ki, Akademik Milli Dram Teatrı yanvarın 26-da koronavirusa görə bağlanıb. Bu haqda Teatrın Mətbuat Xidmətinin rəhbəri Cavid Zeynallı məlumat verib. “Son günlər Akademik Milli Dram Teatrının əməkdaşları arasında COVID-19 infeksiyasına yoluxma hallarının artması ilə əlaqədar qabaqlayıcı-profilaktik tədbirlərin görülməsi qərara alınıb”, - deyə o bildirib.