Direktor 17 yaşlı Məhəmmədlə bağlı danışdı: "Ana ilə bala arasında nə ola bilər?" - VİDEO

3 saylı uşaq evində baş verən qanunsuzluqlar barədə video çəkdikdən sonra 1 nömrəli Respublika Psixiatriya Xəstəxanasına salınan 17 yaşlı Hacıyev Məhəmməd Eldəniz oğlu evə buraxılıb.

BAKU.WS xəbər verir ki, yeniyetmə qardaşı və aparıcı Tarix Əliyevlə birlikdə 3 saylı uşaq evinin direktoru Məhbubə Hüseynovayla görüşüb.

Direktor görüş zamanı bildirib ki, Məhəmmədin Psixiatriya Xəstəxanasına yerləşdirilməsi üçün polisə müraciət edib:

"Özünə qapanmışdı. Deyirdi ki, intihar edəcəm. Onda mən özüm polis bölməsinə müraciət etdim ki, müvəqqəti də olsa uşaq xəstəxanaya yerləşdirilsin. Məhəmməd elə bir uşaqdır ki, həmişə qabaqdangəlmişlik edir. Ana ilə bala arasında nə ola bilər? Uşaq şikayət də, dəcəllik də edə bilər".