"Beyni tam söndürmək" mümkündürmü? – Alimlər açıqlayır

Alimlər bildirir ki, insanın "heç nə düşünmədiyi" anlar mümkündür, lakin bu, beynin dayanması demək deyil.

BAKU.WS xəbər verir ki, araşdırmalara görə, bu vəziyyət mind blanking adlanır. Bu zaman insan qısa müddət ərzində heç bir fikir, obraz və ya daxili nitqi şüurlu şəkildə hiss etmir. Lakin beyin fəaliyyətini davam etdirir.

Mütəxəssislər qeyd edir ki, bu hal adətən uzunmüddətli zehni yorğunluq, yuxusuzluq və ya monoton iş zamanı yaranır. Tədqiqatlar göstərir ki, belə anlarda diqqət zəifləyir və beyin qısa müddətlik "boşluq" vəziyyətinə keçir.

Eyni zamanda vurğulanır ki, bu vəziyyət düşüncələrin dağılması və ya xəyal qurmaqdan fərqlidir. MRT nəticələri göstərir ki, bu zaman beyində aktivlik fərqli şəkildə dəyişir və müxtəlif neyron şəbəkələri arasında əlaqə zəifləyir.

Alimlərin fikrincə, bu hal qısa müddətli olduqda təhlükəli sayılmır və daha çox yorğunluğun göstəricisi kimi qiymətləndirilir. Lakin tez-tez təkrarlanarsa, diqqət pozuntuları və ya digər nevroloji problemlərin əlaməti ola bilər.

Mütəxəssislər bildirir ki, beyni "söndürməyə" çalışmaq düzgün yanaşma deyil. Ən effektiv yol kifayət qədər yuxu və istirahətlə zehni bərpa etməkdir.