Bakıda iki yük maşınından bahalı ehtiyat hissələri oğurlandı - VİDEO

Bakıda "Daf 105" markalı avtomobillərə məxsus 2 ədəd avtomatik idarəetmə qurğusu oğurlanıb.

Bu barədə BAKU.WS-in "qaynar xətti"nə məlumat daxil olub.

Məlumata görə, hadisə Abşeron rayonu, Məmmədli qəsəbəsində qeydə alınıb. Sürücülər yüklərini boşaltmaq üçün "Daşyunu" MMC-nin yerləşdiyi obyektə gəliblər.

Şirkətin qarşısında yük maşınları saxlayan sürücülər bir müddət sonra əraziyə gəldikdə ümumi dəyəri 4 min AZN olan idarəetmə qurğularının oğurlandığını başa düşüblər.

Hadisə ilə əlaqədar Daxili İşlər Nazirliyinin (DİN) Mətbuat Xidmətinin əməkdaşı polis leytenantı Lumu İsrəfilli BAKU.WS-ə bildirib ki, oktyabrın 8-də vətəndaş Ramin İsgəndərov DİN-in "102" Xidməti-Zəng mərkəzinə müraciət edərək idarə etdiyi "Daf 105" markalı avtomobillərə məxsus 2 ədəd avtomatik idarə etmə qurğusunun oğurlanması barədə məlumat verib:

"Daxil olan müraciətlə əlaqədar hazırda Sabunçu RPİ-nin 15-ci Polis Bölməsində təhqiqat araşdırması aparılır".