Azərbaycanda ötən il güzəştli mənzil alışına 29 milyon manat kredit verilib

2024-cü ildə Mənzil İnşaatı Dövlət Agentliyinin (MİDA) sərəncamındakı 470 güzəştli mənzilin alışı üçün 28,8 milyon manat ipoteka krediti verilib.

BAKU.WS xəbər verir ki, bu barədə Nazirlər Kabinetinin 2024-cü ildə fəaliyyəti haqqında hesabatda bildirilir.

Sənədə əsasən, ümumilikdə, 2018-ci ildən etibarən güzəştli mənzillərin satışının maliyyələşdirilməsi üçün 4 885 şəxsə 238,4 milyon manat güzəştli ipoteka krediti, 82 şəxsə isə 3,6 milyon manat adi ipoteka krediti verilib. Eyni zamanda, 2017-2024-cü illərdə ayrılmış vəsaitlər də nəzərə alınmaqla MİDA üçün nəzərdə tutulmuş vəsaitlərin ümumi məbləği 270 milyon manat təşkil edib.

MİDA-nın sərəncamında olan mənzillərin təxminən 80 %-nin satışı Fondun vəsaiti hesabına verilən güzəştli ipoteka krediti vasitəsilə həyata keçirilib.

2006-2024-cü illərdə Fondun vəsaiti hesabına verilən ipoteka kreditlərindən faydalananların 67 %-ni gənclər və gənc ailələr təşkil edib, verilən kreditlərin təqribən 22 %-i regionların payına düşüb.