Qanunsuz erməni hərbi birləşmələri Azərbaycan ərazilərindən çıxarılmalıdır - XİN

“Sülhməramlıların nəzarətində olan ərazilərdə ermənilər yaşayır. Biz hesab edirik ki, onlar Azərbaycan vətəndaşlarıdır”.

BAKU.WS APA-ya istinadən xəbər verir ki, bunu Azərbaycanın xarici işlər nazirinin müavini Xələf Xələfov jurnalistlərə açıqlamasında deyib.

Onun sözlərinə görə, gələcəkdə həmin ermənilərin Azərbaycana inteqrasiyası məsələsi qarşıda duran əsas məsələdir.

“Münaqişə başa çatıb, Azərbaycanın ərazi bütövlüyü bərpa olunub. Orda atəşkəsin pozulması halları olur. Amma təbii ki, bütün bu hallar sülhün möhkəmlənməsinə xidmət etmir və düşünürəm ki, bunlar aradan qaldırılmalıdır. Tam əminəm ki, sülhməramlılar da öz vəzifələrini, öhdəliklərini tam başa düşürlər. Orda olan qanunsuz erməni hərbi birləşmələri birmənalı olaraq çıxarılmalıdır və bu istiqamətdə proses gedəcək. Həmçinin sülhə mane olan bütün hallar aradan qaldırılmalıdır. Atəşkəsin pozulmasına da son qoyulmalıdır”, - Xələf Xələfov qeyd edib.