Eldar Quliyev Hüseynbala Mirələmov haqda: “Deyəcək ki, “mən elə bir şey etməmişəm”

Yeni Azərbaycan Partiyasının Xətai rayon təşkilatının sədri, sabiq deputat Hüseynbala Mirələmovla bağlı internetdə yayılan qeyri-etik video barədə müzakirələr bitmir.

Sosial şəbəkələrdəki müzakirələrdə 76 yaşlı sabiq deputatın ağsaqqal adına yaraşmayan əməli - xanım köməkçisinə qarşı qeyri-əxlaqi hərəkəti qınanılır.

Hüseynbala Mirələmovu qınayanlar eyni zamanda hadisəyə susqun qaldığına görə Azərbaycan Ağsaqqallar Şurasından da narazılıq edirlər.

BAKU.WS xəbər verir ki, Azərbaycan Ağsaqqallar Şurasının sədri Eldar Quliyev modern.az-a açıqlamasında məsələyə sərt münasibət bildirib.

O bildirib ki, belə bir hadisə, həqiqətən, baş veribsə, Hüseynbala Mirələmovun yerinə xəcalət çəkirəm:

“Sosial şəbəkədə görüntüləri gördüm, amma nə qədər düzgün və ya yanlış olduğunu deyə bilmərəm. Bunu araşdırmaq, daha sonra bu barədə fikir irəli sürmək lazımdır.

Bilirsiniz ki, bu dövrdə texnikanın inkişafı ilə çox hadisələr etmək olar. Videonu görəndə hansısa montaj olduğunu hiss etmədim. Yenə də araşdırmaq mütləqdir. Hüseynbala müəllimlə işlədiyimiz müddətdə mən onun heç zaman belə bir hadisələr etməsilə qarşılaşmamışam. Özü də ziyalı, alim adamdır. Əgər belə bir hadisə, həqiqətən, baş veribsə, mən onun yerinə utanıb xəcalət çəkirəm. Çünki belə bir yaşda bu cür hərəkət etməsi düzgün olmaz.

Hadisənin düzgünlüyü təsdiqlənsə, bu barədə Ağsaqqallar Şurası tərəfindən də ciddi tədbirlər görüləcək. Texnika o qədər inkişaf edib ki, insan nəyin doğru, nəyin yanlış olduğunu da bilmir.

Hüseynbala Mirələmovla əlaqə saxlamamışam. Yəqin ki, bu hadisə həqiqət olsa da, deyəcək ki, “mən elə bir şey etməmişəm”. Gözləyək, araşdırılsın, həqiqət sübuta çıxarılsın, daha sonra nəticəyə uyğun tədbir görülər”.