Dağda çobanlıq edə-edə Türkiyə üzrə ikinci ən yüksək balı topladı - FOTO/VİDEO

Türkiyənin Elazığ vilayətinin Ağdağ bölgəsində çobanlıq edən Mehmet Halil Yazar adlı gənc Türkiyədə 8-ci sinfi bitirəndən sonra verilən liseyə qəbul imtahanında ölkə üzrə ikinci ən yüksək bal toplayıb.

BAKU.WS-in oxu.az-a istinadən məlumata görə, Elazığın ən ucqar mahallarından birində yaşayan 14 yaşlı oğlanın atası qeyd edib ki, oğlu həm çobanlıq edərək ailəyə kömək edir, eyni zamanda mütəmadi olaraq dərslərini oxuyub.

Atası vurğulayıb ki, oğlu dağda heyvan otararkən özü ilə götürdüyü kitabları davamlı mütaliə edib və lisey imtahanında iştirak etməkdə israrlı olub.

“Nəticədə 494 bal toplayıb, ölkə üzrə ikinci ən yaxşı nəticəyə nail olduq. Çox qürurluyuq”, - deyə gənc istedadın atası bildirib.

Qeyd edək ki, Türkiyədə uşaqlar 8-ci sinfi bitirəndən sonra LGS (Liseye Geçiş Sınavı) imtahanı verirlər. Bu, olduqca çətin imtahan hesab olunur.