"Artıq 3 ildir atamdan nə şəkil gəlir, nə video".

Bu barədə BAKU.WS-in bölgə müxbirinə Dilqəm Əsgərovun oğlu Kürdoğlu Əsgərov bildirib.

Onun sözlərinə görə, sonuncu dəfə atasından aprel ayının 20-si məktub alıb.

"Atam məktubda iki-üç cümlə yazıb. "Hələ ki sağam, salamatam". Əslində isə Beynəlxalq Qırmızı Xaç Komitəsi tərəfindən 3 ayda bir dəqiqəlik video və şəkil gəlməlidir. Ayda bir dəfə isə məktub almalıyam. Lakin bunların heç biri yoxdur" - deyə K.Əsgərov bildirib.

Qeyd edək ki, 2014-cü ilin iyun ayının 11-də Rusiya vətəndaşı Dilqəm Əsgərov və Azərbaycan vətəndaşları Şahbaz Quliyevlə Həsən Həsənov yaxınlarının məzarını ziyarət etmək üçün Azərbaycanın işğal altında olan Kəlbəcər rayonuna gediblər.

Həmin gün Şaplar kəndində Ermənistan silahlı qüvvələri tərəfindən keçirilən əməliyyat zamanı Dilqəm Əsgərov və Şahbaz Quliyev girov götürülüb. Həsən Həsənov isə güllələnərək öldürülüb.

BAKU.WS