Yeməklə su, qəhvə və çay qəbul etmək olar? - Hər kəsin doğru bildiyi demə yalanmış

Yemək zamanı su, çay və ya qəhvə içməyin guya həzmi pozduğu və mədəni genişləndirdiyi barədə fikirlər həqiqətə uyğun deyil.

BAKU.WS xəbər verir ki, bu barədə Gazeta.Ru-ya endokrinoloq və dietoloq, tibb elmləri namizədi Oksana Mixaleva məlumat verib.

Onun sözlərinə görə, geniş yayılmış yanlış fikirlərdən biri də budur ki, yeməyi hər hansı içki ilə içmək olmaz, çünki bu halda guya mədə turşusu durulaşır və qidanın həzmi çətinləşir.

"Əslində, mədə konkret qidanın həzm olunması üçün lazım olan qədər turşu ifraz edir. Bu prosesi turşuluğun səviyyəsini nəzarətdə saxlayan xemosensorlar tənzimləyir. Əgər insan yeməyi içki ilə içirsə, mədə şirəsinin konsentrasiyasındakı müvəqqəti azalma sadəcə əlavə turşu ifrazı ilə kompensasiya olunur və həzm prosesi pozulmur. Əksinə, nəmli qida daha yaxşı qarışır və mədə şirəsinin təsirinə daha əlçatan olur", – deyə ekspert izah edib.

Mixaleva həmçinin yemək zamanı içilən mayenin mədəni genişləndirə bilməsi barədə mifi də təkzib edib. Onun sözlərinə görə, bu, mümkün deyil, çünki su mədəni çox tez tərk edir və onun ölçüsünə təsir göstərə bilmir.

"Mədəni yalnız mütəmadi və çoxlu yeməklə - yəni artıq yeməklə - genişləndirmək mümkündür. Maye bununla əlaqəli deyil. Əksinə, bəzi hallarda həkimlər hətta yeməyi su ilə içməyi məsləhət görürlər - məsələn, mədə-bağırsaq xəstəliklərində həzmi yüngülləşdirmək üçün, həmçinin artıq çəkili insanlara. Su lifləri hopdurur, onların həcmini bir neçə dəfə artırır və bu da toxluq hissinin daha tez yaranmasına kömək edir", – deyə həkim əlavə edib.

Çay və qəhvəyə gəlincə, mütəxəssis qeyd edib ki, onların yemək zamanı orta miqdarda qəbulu da təhlükəsizdir. Bəzən belə bir fikir səsləndirilir ki, bu içkilərdəki taninlər vitamin və mineralların mənimsənilməsinə mane olur.

"Bu, doğru deyil. Taninlər vitaminlərin sorulmasına ümumiyyətlə təsir etmir. Mineralların mənimsənilməsinə isə müəyyən qədər təsir edə bilər, amma bu, əsasən mineral əlavələrin qəbuluna aiddir. Qidada olan minerallar amin turşuları və digər molekullarla bağlı olur, buna görə də bir-iki fincan içkidəki az miqdarda tanin onların mənimsənilməsinə mane olmur", – deyə Mixaleva vurğulayıb.

Bununla yanaşı, o qeyd edib ki, mineral tərkibli bioloji fəal əlavələrin (BAD) qəbulunda əlavə ehtiyat tədbirləri lazımdır. Çay və qəhvə maqnezium, dəmir, mis, sink və kalsiumla olan əlavələrin mənimsənilməsini azalda bilər, buna görə də içkilərlə bu əlavələrin qəbulu arasında 2–4 saat fasilə saxlamaq tövsiyə olunur. Bu, bəzi dərman preparatlarına da aiddir.