Qış boyu sağlam qalmaq istəyirsinizsə bu qidaları süfrənizdən əskik etməyin - Həkim sadaladı

Qışda insan orqanizminin immunitet sistemini gücləndirmək və enerjiyə qənaət etmək üçün xüsusilə dəstəyə ehtiyacı var.

BAKU.WS xəbər verir ki, rusiyalı həkim-mütəxəssis Andrey İsayev "İzvestiya"ya açıqlamasında qışda orqanizmin hansı vitaminlərə ehtiyacı olduğunu və onların tərkibində olan məhsulların nümunələri barədə danışıb.

Mütəxəssis A vitaminini (retinol) xüsusi vurğulayıb.

Onun sözlərinə görə, bu, yerkökü, balqabaq, ispanaq, brokkoli, qaraciyər və yumurtada olur.

Görmə qabiliyyətini yaxşılaşdırır, dərini sağlam saxlayır və immunitet sistemini gücləndirir.

"B6 vitamini və ya piridoksin banan, avokado, qoz, balıq, toyuq, kartof və paxlalılar kimi qidalarda ola bilər. Bu vitamin amin turşularının mübadiləsində iştirak edir, neyrotransmitterlərin sintezi üçün lazımdır və sinir sisteminin fəaliyyəti üçün vacibdir", - İsayev izah edib.

O, B9 vitamininin (fol turşusu) ispanaq, qulançar, mərcimək, lobya, sitrus meyvələri və çuğundurda olduğuna da diqqət çəkib. DNT və RNT sintezi, hüceyrə bölünməsi və hematopoez üçün lazımdır. Fol turşusu çatışmazlığı hüceyrə bölünməsinin pozulmasına və zəhərli metabolitlərin yığılmasına səbəb olur.

"B12 vitamini və ya kobalamin ət, balıq, süd məhsulları və yumurtada olur. Hematopoez, endokrin və sinir sistemlərinin işləməsi üçün vacibdir. C vitamini (askorbin turşusu) çox miqdarda sitrus meyvələrində, kividə, çiyələkdə, bolqar bibərində, brokolidə, Brüssel kələmində və kartofda olur. O, immun sistemini gücləndirir, yaraların sağalmasını sürətləndirir və antioksidantdır", - ekspert qeyd edib.

Ejspert deyir ki, D vitamini qanda kalsium və fosforun səviyyəsini tənzimləyir, immunitet sisteminə infeksiyalar və xərçəng hüceyrələri ilə mübarizə aparmağa kömək edir, iltihabi proseslərin şiddətini azaldır, həmçinin sağlam sümüklər və dişlər üçün vacibdir, onu balıq, yumurta sarısı və süd məhsullarından əldə etmək olar.

Ekspert həmçinin xəbərdarlıq edib ki, kalium, maqnezium, sink və dəmir kimi minerallar insan orqanizminin normal fəaliyyətində əsas rol oynayır.

Məsələn, kalium hüceyrələrdə və toxumalarda su, turşu və elektrolit balansının tənzimlənməsində iştirak edir, ürək fəaliyyətinin normal ritmini saxlayır, sinir impulslarının aparılmasında və qan təzyiqinin normallaşdırılmasında iştirak edir. Kalium mənbələrinə banan, kartof, avokado, pomidor, ispanaq və qurudulmuş meyvələr daxildir.