İnsanın genetikası yoluxucu xəstəliklərə həssaslığı müəyyən edə bilər

İnsanın genetikası yoluxucu xəstəliklərə həssaslığı müəyyən edə bilər.

BAKU.WS xəbər verir ki, mütəxəssislərin fikrincə insanın genetik quruluşu yalnız irsi xəstəliklərə deyil, həm də yoluxucu xəstəliklərə qarşı həssaslığa və ya davamlılığa təsir edə bilər.

Genetik mutasiyalar bəzi hallarda birbaşa xəstəliyin səbəbi olur. Məsələn, oraqvari hüceyrə anemiyası, kistik fibroz və hemofiliya kimi xəstəliklər insanın DNT-sindəki dəyişikliklər nəticəsində yaranır.

Eyni zamanda, müəyyən gen dəyişiklikləri insanı yoluxucu xəstəliklərdən qoruya və ya əksinə, daha həssas edə bilər. Məsələn, CCR5-delta32 mutasiyasına sahib şəxslər HİV-ə qarşı təbii müqavimət göstərir, bəzi HLA gen variantları isə hepatit B və malyariyaya qarşı qoruyucu təsirə malikdir.

Mütəxəssislərin fikrincə, genetika yoluxucu xəstəliklərin qarşısını tamamilə ala bilməsə də, xəstəliyin gedişatını, orqanizmin reaksiyasını və sağalma prosesini ciddi şəkildə formalaşdıra bilər. Bu səbəbdən gələcəkdə genetik tədqiqatların fərdi müalicə və profilaktika strategiyalarında mühüm rol oynayacağı gözlənilir.