Alimlər: Gündə cəmi iki siqaret çəkmək belə erkən ölüm riskini 60% artırır

Johns Hopkins Universitetinin Ürək-damar Xəstəliklərinin Qarşısının Alınması Mərkəzinin alimləri müəyyən ediblər ki, gündə cəmi iki siqaret belə erkən ölüm ehtimalını 60% artırır.

BAKU.WS xəbər verir ki, bu barədə "Gazeta.ru" saytı məlumat verib.

Tədqiqat çərçivəsində mütəxəssislər 300 mindən çox insanın sağlamlıq məlumatlarını təhlil ediblər. Nəticəyə görə, az intensivlikdə siqaret çəkmək (gündə 2–5 siqaret) belə infarkt, ürək çatışmazlığı və vaxtından əvvəl ölüm riskini ciddi şəkildə yüksəldir.

Alimlərin fikrincə, belə siqaret çəkənlərdə ölüm riski zərərli vərdişi olmayan insanlarla müqayisədə 60% daha çoxdur. Bundan əlavə, "yüngül" siqaret çəkmək ürək çatışmazlığı riskini 50% artırır.

Mütəxəssislər bildiriblər ki, siqareti buraxdıqdan sonra ən böyük sağlamlıq yaxşılaşması ilk 10 ildə müşahidə olunur. Lakin onlar qeyd edirlər ki, hətta siqareti tərgidənlərdə belə 30 il sonra ürək çatışmazlığı riski tamamilə yox olmur.

Alimlərin sözlərinə görə, siqaret sayını azaltmaq, xəstəliklər riskini aşağı salmaq üçün effektli üsul deyil. Yeganə real təsir göstərən metod tamamilə tərgitməkdir.