Şahin Bayramov: Biz yalnız azad deyil, həm də bütöv, güclü və müasir bir dövlətin qalib vətəndaşlarıyıq

Bu gün Müsəlman Şərqində ilk demokratik dövlət sayılan Azərbaycan Xalq Cümhuriyyətinin yaradılmasının 107-ci ildönümünü və Müstəqillik Gününü böyük fəxarətlə qeyd edirik. Milli dövlətçilik tariximizin şərəfli səhifələrindən hesab edilən bu əlamətdar günün "Konstitusiya və Suverenlik İli" çərçivəsində, Azərbaycanın tam suverenliyi və ərazi bütövlüyü şəraitində qeyd olunması qürur hissimizi daha da artırır.

Bu fikirlər Qarabağ Universitetinin rektoru Şahin Bayramovun Azərbaycan Xalq Cümhuriyyətinin yaradılmasının 107-ci ildönümünü ilə bağlı məqaləsində yer alıb.

BAKU.WS AZƏRTAC-a istinadən həmin məqaləni təqdim edir.

1918-ci ilin mayın 28-də Azərbaycanın müstəqilliyini bəyan edən İstiqlal Bəyannaməsinin qəbul olunması ilə ölkəmizin adı ilk dəfə müstəqil dövlət kimi dünyanın siyasi arenasında yerini tapdı. Tarixi yaddaşımızın bu parlaq səhifəsi – xalqımızın azadlıq, milli iradə və mətinlik ruhunun təcəssümüdür.

Həmin dövrdə dünyanın və regionun mürəkkəb geosiyasi mənzərəsinə baxmayaraq, xalqımız demokratik ideyalar əsasında müstəqil dövlət qurmağı bacardı. Bu uğur xalqımızın azadlıq iradəsinin, zəngin intellektual potensialının və dərin dövlətçilik ənənələrinin bariz göstəricisidir. Yalnız 23 ay mövcud olan Azərbaycan Xalq Cümhuriyyəti qısa zamanda əhəmiyyətli dövlətçilik islahatlarına imza ataraq gələcək müstəqilliyimiz üçün mühüm təməl formalaşdırdı. Cümhuriyyətin tarixi əhəmiyyətini hər zaman yüksək dəyərləndirən Ümummilli Lider Heydər Əliyevin bu sözləri xüsusilə diqqətəlayiqdir: "Bu respublikanın yaranması və az müddətdə də olsa yaşaması Azərbaycan xalqının dövlətçiliyinin bərpasında, Azərbaycanın dövlət müstəqilliyini əldə etmək yolunda, demokratik quruluş yaratmaq istiqamətində tarixi rol oynamışdır. Azərbaycan Xalq Cümhuriyyəti bir çox dəyərli işlər görmüş və Azərbaycanı bir müstəqil demokratik respublika kimi yaşatmağa çalışmışdır".

Sovet imperiyasının süqutundan sonra, 1991-ci ildə Azərbaycan müstəqilliyini bərpa etdikdə, Cümhuriyyətin ruhu xalqın qəlbində yaşayırdı. Amma müstəqilliyi sadəcə elan etmək deyil, onu qorumaq, möhkəmləndirmək və inkişaf etdirmək ən böyük məsuliyyətdir. Məhz bu mərhələdə xalqın birliyi və Ümummilli Lider Heydər Əliyevin xilaskarlıq missiyası Azərbaycanın sabit və qüdrətli gələcəyinin əsasını qoydu. Ulu Öndərimizin qətiyyəti və uzaqgörən liderliyi ilə müstəqilliyimiz dönməz xarakter aldı.

Əbədiyaşar liderimizin siyasi irsi, milli maraqlara əsaslanan dövlətçilik fəlsəfəsi bu gün də Prezident İlham Əliyev tərəfindən müasir çağırışlara uyğun uğurla davam etdirilir. Xalq Cümhuriyyətinin siyasi və mənəvi varisi olan müstəqil Azərbaycan hazırda tarixinin ən qüdrətli və əzəmətli mərhələsini yaşayır. Artıq biz yalnız azad deyil, həm də bütöv, güclü və müasir bir dövlətin qalib vətəndaşlarıyıq. 2020-ci ildə 44 günlük Vətən müharibəsində və 2023-cü ildə bir gündən az müddətdə aparılan lokal antiterror tədbirləri nəticəsində Azərbaycanın ərazi bütövlüyü və suverenliyi tam bərpa olundu. Hələ Azərbaycan Xalq Cümhuriyyəti dövründə mövcud olan və onun zəifləməsi, müstəqilliyinin itirilməsi səbəblərindən biri kimi qiymətləndirilən Qarabağ münaqişəsinə və erməni işğalına artıq son qoyuldu. Bu, təkcə hərbi qələbə deyil, həm də müstəqilliyimizin yüksək mənəvi və siyasi zirvəyə ucalması deməkdir. Bu, dövlətçiliyimizin və xalqımızın iradəsinin real təntənəsidir.

Dövlət başçımızın "Biz Azərbaycan Xalq Cümhuriyyətinin qurucularının arzularını reallığa çevirdik" sözləri təkcə keçmişə ehtiram deyil – bu, həm də bugünkü güclü Azərbaycanın varlığına verilən dəyərli və dərin mənalı tarixi qiymətdir. Çünki Azərbaycanın hazırkı suverenliyi, ərazi bütövlüyü, regional liderliyi və beynəlxalq nüfuzu məhz həmin milli ruhun çağdaş formasıdır.

Qarabağ torpaqlarının azad olunması və dirçəldilməsi isə bu milli ruha verilən misilsiz yeni nəfəsdir. Bu, milli qürur, tarixi ədalət və gələcəyə doğru atılmış inamlı addımdır. Qarabağ Universiteti olaraq, biz bu dirçəlişin bir parçası olmağın məsuliyyətini və qürurunu daşıyırıq. Universitetimiz təkcə bilik verən təhsil müəssisəsi deyil, eyni zamanda müasir Azərbaycanın memarı Heydər Əliyevin ideyalarının, milli kimliyin, dövlətçilik düşüncəsinin və müstəqillik ruhunun yaşadıldığı ocaqdır. Azad edilmiş Qarabağ torpaqlarında elm və təhsil yolu ilə gələcəyin düşünən, yaradıcı və milli dəyərlərə sadiq vətənpərvər vətəndaşlarını yetişdirmək bizim borcumuzdur.

Qarabağ Universiteti ailəsi olaraq, belə bir əlamətdar gündə, xalqımıza müstəqillik ənənəsini bəxş edən cümhuriyyət qurucularını, bu ənənəyə sədaqət göstərərək müasir Azərbaycanın memarına çevrilən və müstəqilliyimizi əbədiləşdirən Ulu Öndər Heydər Əliyevi, eləcə də azadlığımız, suverenliyimiz və xoşbəxt gələcəyimiz naminə canından keçən qəhrəman şəhidlərimizi dərin ehtiram və sonsuz minnətdarlıqla anırıq.