“Xudafərin” və “Qız qalası” su qovşaqlarının, elektrik stansiyalarının tikintisi və iki ölkə arasında birgə istifadəsi gündəlikdə olan vacib məsələlərdəndir".

BAKU.WS "APA"ya istinadən xəbər verir ki, Ceyhun Bayramov bu barədə İranın xarici işlər naziri Əmir Hüseyn Abdullahiyanla keçirdiyi mətbuat konfransında deyib.

C.Bayramov keçirdiyi mətbuat konfransında bildirib ki, iranlı həmkarı ilə çox maraqlı və faydalı görüşü olub.

"Hesab edirəm ki, tarixi, mədəni və dini bağlara əsaslanan, ölkələrimiz arasında olan mehriban qonşuluq və dostluq münasibətlərinin mövcud mərhələdə daha da inkişaf etdirilməsi üçün səfərlər olduqca vacibdir.

Görüşdə ikitərəfli əlaqələrin inkişafı, beynəlxalq platformalarda əməkdaşlıq, eləcədə iqtisadi əlaqələrin inkişafı haqqında müzakirələr apardıq."

Ceyhun Bayramov qeyd edib ki, 2021-ci ildə iki ölkənin iqtisadi əlaqələri 2020-ci ilə müqayisədə 30 faiz artıb. "2022-ci ilin ilk 5 ayında ticarət dövriyyəsində 2021-ci ilin eyni dövrü ilə müqayisədə 18 faiz artım var. İki ölkə arasında iqtisadi əlaqələrin inkişafı üçün geniş potensial mövcuddur. Son illər ərzində həyata keçirilən və icra olunan layihələrə diqqətimiz davam etməlidir. Eyni zamanda bir sıra yeni razılaşmalar həyata keçirilməyə başlanmalıdır ki, qarşılıqlı investisiyalar və iqtisadi əlaqələr daha da artırılsın. Müştərək avtomobil, avtomobillərin ehtiyat hissələrinin və kənd təsərrüfatı texnikasının istehsalı ilə yanaşı bir sıra digər layihələrə də diqqət yetirilməlidir. “Xudafərin” və “Qız qalası” su qovşaqlarının, elektrik stansiyalarının tikintisi və iki ölkə arasında birgə istifadəsi gündəlikdə olan vacib məsələlərdəndir".

Nazir Şimal-Cənub Dəhlizi çərçivəsində Azərbaycan və İran Astarası arasında ən qısa zamanda dəmir yolu terminalının tikintisinin başa çatdırılacağını bildirib və qeyd edib ki, bununla bağlı bir sıra texniki sənədlər artıq hazırlanır.

C.Bayramov qeyd edib ki, Şərqi Zəngəzurla Naxçıvanı birləşdirəcək layihə çərçivəsində artıq ilk körpü ilə bağlı texniki göstəricilər razılaşdırılıb və tezliklə körpünün tikintisinə başlanacaq.

Xatırladaq ki, Ceyhun Bayramov Tehrana səfəri çərçivəsində İran parlamentinin spikeri Məhəmməd Bağır Qalibafla da görüşüb.

Onun İran Prezidenti İbrahim Rəisi ilə də görüşü planlaşdırılır.

BAKU.WS