055 213 76 73
"Yoluxma hallarının artması delta ştamı ilə bağlıdır. Bu ştamda yoluxuculuq qabiliyyəti COVID-19-a nisbətən orta hesabla 30-50 faiz çoxdur.
Delta variantında yoluxuculuq yüksəkdirsə, deməli, ölüm halları da yüksəkdir. Sadə təhlil apararaq görərik ki, COVID-19 infeksiyasında ölüm halları 4-5 faiz hallarda olurdusa, delta ştammında bu, 10-12 faiz arasında dəyişir. Yəni ötənilki rəqəmləri bu illə müqayisə edəndə görürük ki, ölüm halları təxminən 2 dəfə artıb".
BAKU.WS xəbər verir ki, bunu “report”a açıqlamasında tibb üzrə fəlsəfə doktoru, infeksionist Vüqar Cavadzadə deyib.
Onun sözlərinə görə, hələ də virusu ciddi qəbul etməyən insanlar var:
“Yayda karantin qaydaları yumşaldılandan sonra insanlar COVID-19-un varlığını unutdular. Qapalı yerlərdə maskasız, toylarda 50 nəfərlik adı ilə 200-300 nəfər iştirak halları yoluxmaları artırdı. İndi bir az COVID pasportuna görə vaksin olunanların sayında artım var.
Hesab edirəm ki, hələ 20 gün, 1 ay müddətinə yoluxma yüksək göstəricilərlə davam edəcək. Ondan sonra nisbətən səngiməsi müşahidə ediləcək. Buna görə insanlar vaksinasiya olunmalıdırlar, çünki xəstəliyin qarşısının alınmasında vaksinasiya birinci yerdə dayanır”.
İnfeksionist qeyd edib ki, bəzi insanlar temperaturu olduğu halda buna əhəmiyyət vermir:
“Soyuq olduğunu, guya kondisionerdə yatdıqlarını bəhanələr gətirirlər. Evdə düzgün müalicə almırlar, gecikdirirlər. Xəstəliyin ikinci həftəsindən artıq ağırlaşmalar başlayır. O zaman düşür xəstəxanaya. Bilirik ki, bu virusun konkret dərmanı yoxdur.
Olsaydı, xəstəxanalarda bu qədər insanlar ölməzdi. Xəstəxanada da həkimlər sehrbaz deyil ki, çubuğunu işə salıb ağır xəstələri vəziyyətdən çıxarsın.
Ağır xəstələrin vəziyyətdən çıxması sadəcə bir şans məsələsidir. Xəstəxanalarda rəsmi olaraq gündəlik 40-45 nəfər ölür, qeyri-rəsmi rəqəmlər, bəlkə də, iki dəfə artıqdır”.
V.Cavadzadə insanlara çağırış edib:
“Öz həyatlarına laqeyd yanaşmasınlar, evdə tibb bacılarının özbaşına yazdıqları dərmanları qəbul etməsinlər. Onlar elə dərmanlar yazırlar ki, o dərman virusun müalicəsinə əks göstərişdir. Çoxu sistemlər məsləhət görür, çünki öz maraqlarını güdürlər.
Sistemin birini 30-50 manata vururlar. Gəlir çox əldə etmək üçün çoxlu sistemlər yazırlar. Bu da xəstələri pis günə qoyur. İnsanlar axtarıb mütəxəssis, həkim infeksionistlərlə məsləhətləşsinlər. Ölkədə kifayət qədər infeksionist var”.