Coy-Lens Mikels Azərbaycan futbolunda ilkə imza atdı

"Sabah"ın hücumçusu Coy-Lens Mikels Azərbaycan futbol tarixinə düşüb.

BAKU.WS Futbolinfo.az-a istinadən xəbər verir ki, almaniyalı futbolçu UEFA Konfrans Liqasının II təsnifat mərhələsində Moldovanın "Petrokub" klubu ilə cavab matçında bunu reallaşdırıb.

"Bank Respublika Arena"da baş tutan görüşdə Mikels het-trikə imza atıb. Bu, "Sabah"a 4:1 hesablı qələbə qazandırıb. Mikels Azərbaycan klublarının heyətində avrokuboklarda bir dəfədən çox het-trikə imza atan ilk oyunçu olub. Özü də futbolçu hər iki nailiyyəti cari mövsümdə əldə edib. O, UEFA Avropa Liqasının I təsnifat mərhələsində "Selye" ilə qarşılaşmada da rəqib qapısından 3 top keçirmişdi.

31 yaşlı almaniyalı hücumçu Azərbaycan klublarının heyətində avrokuboklarda het-trik edən 5 futbolçudan biridir. Ona qədər 4 oyunçu - Badri Kvaratsxeliya, Olavio Juninyo, Ernest Nfor və Teo Uiks hərəyə bir dəfə Avropa Arenasında het-trik müəllifi olublar.

2000/01 mövsümü, Çempionlar Liqası

Badri Kvaratsxeliya - 19.07.2000. "Şəmkir" - "Skonto" (Latviya) - 4:1 (əlavə vaxtda).

2014/15 mövsümü, Avropa Liqası

Ernest Nfor - 07.08.2014. "Çixura" (Gürcüstan) - "Neftçi" - 2:3.

2015/16 mövsümü, Avropa Liqası

Teo Uiks - 30.06.2015. "Qəbələ" - "Samtredia" (Gürcüstan) - 5:1.

2024/25 mövsümü, Çempionlar Liqası

Olavio Juninyo - 30.07.2024. "Qarabağ" - "Linkoln" (Cəbəllüttariq) - 5:0.

2025/26 mövsümü, Avropa Liqası

Coy-Lens Mikels - 17.07.2025. "Selye" (Sloveniya) - "Sabah" - 3:3 (əlavə vaxtda).

2025/26 mövsümü, Konfrans Liqası

Coy-Lens Mikels - 31.07.2025. "Sabah" - "Petrokub" (Moldova) - 4:1.

Qeyd edək ki, "Sabah" "Petrokub"u hər iki oyunda məğlub edərək (2:0, 4:1) III təsnifat mərhələsinə yüksəlib.