055 213 76 73
Polşa, Litva və Braziliyada fəaliyyət göstərən, təsdiqdən keçməyən müəssisələrdən Azərbaycana yüksəkriskli qida məhsullarının idxalına məhdudiyyət qoyulacaq.
BAKU.WS xəbər verir ki, bu barədə Azərbaycan Qida Təhlükəsizliyi Agentliyindən (AQTA) məlumat verilib.
Bildirilib ki, “Qida təhlükəsizliyi haqqında” qanuna əsasən, yüksək risk qrupuna aid edilən heyvan mənşəli qida məhsullarının Azərbaycan Respublikasının gömrük ərazisinə idxal olunması üçün həmin məhsulların istehsalı və emalı ilə məşğul olan qida obyektləri cavabdeh qida subyektlərinin müraciəti əsasında Qida Təhlükəsizliyi Agentliyi tərəfindən təsdiq edilməlidir. Müvafiq qanunun icrasının təmin olunması məqsədilə bir sıra dövlətlərdən, o cümlədən Polşa, Litva və Braziliyadan ölkəmizə bu cür qida məhsullarının idxalı ilə məşğul olan şirkətlərin nümayəndələri ilə görüşlər keçirilib, onlara yüksəkriskli qida və yem məhsullarının idxalı sahəsində həyata keçirilən tədbirlər barədə ətraflı məlumat verilib.
Qeyd olunub ki, adıçəkilən ölkələrdə fəaliyyət göstərən müəssisələrdən respublikaya məhsul idxal olunmasına, eləcə də dəfələrlə xəbərdarlıq edilməsinə baxmayaraq, agentliyə bu ölkələrin istehsalçılarından təsdiqlə bağlı müraciətlər daxil olmayıb. Bununla əlaqədar noyabrın 15-dən təsdiq üçün müraciət etməyən, Polşa, Litva və Braziliyada fəaliyyət göstərən müəssisələrdən ölkəmizə yüksəkriskli qida məhsullarının gətirilməsinə məhdudiyyət tətbiq olunacaq.