Uzun müddət oturmaq xərçəngdən ölüm riskini 9 faiz artırır

Böyük Britaniyada 91 mindən çox insanın iştirakı ilə aparılan araşdırma uzun müddət hərəkətsiz oturmağın xərçəngdən ölüm riskini artırdığını ortaya çıxarıb.

BAKU.WS xəbər verir ki, Qlazqo Universitetinin alimləri UK Biobank məlumatlarında yer alan iştirakçıların fiziki aktivliyini təxminən 12 il ərzində izləyiblər.

Müəyyən edilib ki, ən azı 30 dəqiqə hərəkətsiz oturulan hər əlavə saat xərçəngdən ölüm riskini 9 faiz artırır.

Araşdırmada uzunmüddətli hərəkətsizliyin qaraciyər, böyrək, mədəaltı vəzi, yoğun bağırsaq, süd vəzi və qalxanabənzər vəzi xərçəngi də daxil olmaqla bir sıra xəstəliklərlə əlaqəsi araşdırılıb.

Alimlərin fikrincə, gündə bir saat oturma müddətinin yüngül fiziki aktivliklə əvəzlənməsi xərçəngdən ölüm riskini 12 faiz azalda bilər.

Mütəxəssislər xüsusilə masa arxasında işləyənlərə gün ərzində qısa gəzintilər etməyi və uzun müddət fasiləsiz oturmaqdan çəkinməyi tövsiyə edirlər.

Araşdırmanın müşahidə xarakterli olduğu və səbəb-nəticə əlaqəsini tam sübut etmədiyi də vurğulanıb.