Tramp və Şara Suriyada keçid prosesini müzakirə ediblər

Suriya Prezidenti Əhməd Şaranın ABŞ Prezidenti Donald Tramp ilə telefon danışığında Suriyadakı keçid prosesi və sabitlik məsələlərini müzakirə etdiyi bildirilib.

BAKU.WS xəbər verir ki, Suriya Prezidentliyindən yayılan yazılı açıqlamaya görə, telefon danışığı zamanı Suriyada gedən keçid prosesinə dair son vəziyyət, eləcə də regional və beynəlxalq hadisələr ətrafında fikir mübadiləsi aparılıb. Görüşdə ölkədə sabitliyin və təhlükəsizliyin möhkəmləndirilməsi üçün göstərilən səylər də dəyərləndirilib.

Prezident Əhməd Şara Suriyanın suverenliyinə, ərazi bütövlüyünə və dövlət institutlarının qorunmasına sadiqliyini bir daha vurğulayıb, ölkədə daxili barışığın gücləndirilməsi istiqamətində qətiyyətli olduqlarını bildirib. O, həmçinin DEAŞ başda olmaqla terror təşkilatlarının Suriyada yenidən fəallaşmasının qarşısının alınması üçün beynəlxalq səylərin birləşdirilməsinin vacibliyinə diqqət çəkib.

Şara qeyd edib ki, aktiv diplomatiya regiondakı böhranların aradan qaldırılmasının yeganə yoludur və yeni Suriyanın beynəlxalq tərəfdaşlarla qarşılıqlı hörmət və ortaq maraqlar əsasında əməkdaşlığa açıq olduğunu bildirib. O, regional münaqişələrin həllində dialoq dilinin üstün tutulması məsələsində Tramp ilə ortaq mövqeyə gəldiklərini də vurğulayıb.

ABŞ Prezidenti Donald Tramp isə Vaşinqtonun Suriya xalqının vahid və güclü dövlət qurmaq istəyinə dəstəyini bir daha ifadə edib. Tramp, SDQ daxil olmaqla silahlı qüvvələrin rəsmi dövlət strukturlarına inteqrasiyası ilə bağlı əldə olunan razılaşmaları müsbət qiymətləndirib.

ABŞ lideri, investisiyaların təşviqi və kapital üçün cəlbedici mühitin yaradılması yolu ilə Suriyanın yenidən qurulmasına dəstək verməyə hazır olduqlarını bildirib və Suriyanın iqtisadi sabitliyinin Yaxın Şərq regionunun sabitliyində mühüm rol oynadığını qeyd edib.