Türkmənistan millisinin xokkeyçiləri Asiya Oyunlarında Honq-Konq oyunçularına hücum edib

Çinin Xarbin şəhərində keçirilən Qış Asiya Oyunlarında Türkmənistan millisinin xokkeyçiləri Honq-Konq yığmasının oyunçularına hücum edib.

BAKU.WS xəbər verir ki, bu barədə Honq-Konq Olimpiya Komitəsinin (SF&OC) rəsmi saytında məlumat yayılıb.

İnsident matçdan sonrakı əl sıxma mərasimi zamanı baş verib. Hadisənin təşəbbüskarlarının Türkmənistan millisinin üç xokkeyçisi olduğu bildirilir. Kütləvi dava nəticəsində Honq-Konq yığmasının iki oyunçusu xəsarət alıb və onlara tibbi yardım göstərilib. Oyun 5:1 hesabı ilə Honq-Konqun qələbəsi ilə başa çatıb.

Honq-Konq Olimpiya Komitəsi hadisə ilə bağlı Beynəlxalq Xokkey Federasiyasına (IIHF), Asiya Olimpiya Şurasına (OCA) və turnirin təşkilatçı qurumlarına rəsmi müraciət edərək intizam tədbirlərinin görülməsini tələb edib.