Di Marzio: "Yaxın saatlarda "Qalatasaray" Osimhenin transferini açıqlayacaq"

"Qalatasaray" Viktor Osimhenin transferində xoşbəxt sona çox yaxındır.

BAKU.WS xəbər verir ki, insayder Cianluka Di Marzio yaxın saatlarda transferin açıqlanacağını yazıb. İtaliyaya son səfərini edəcək Abdullah Kavukçu transferi yekunlaşdırıb Osimhenlə birlikdə İstanbula qayıtmağa hazırlaşır.

Xatırladaq ki, transfer prosesi zamanı Səudiyyə Ərəbistanının "Əl Hilal" klubu Osimhenə göz oxşayan təklif edib. Bununla belə, 25 yaşlı futbolçu Avropada qalaraq karyerasını "Qalatasaray"da davam etdirməyə üstünlük verib. Bu qərar klub tərəfindən böyük ruh yüksəkliyi ilə qarşılanıb.

"Qalatasaray" Osimhenin transfer qiyməti üçün "Napoli"yə 75 milyon avro ödəməyə razılaşıb. Bu məbləğin 40 milyon avrosu əvvəlcədən ödəniləcək, qalan 35 milyon avro isə 2026-cı ilin sonuna qədər ödəniləcək. Osimhen bonuslar istisna olmaqla, 16 milyon avro xalis illik maaş alacaq.